Read Yimchungru Naga Abe 7 Bible Online

Abe 7 - Yimchungru Naga bible

Abe 7

¹Jumonü ATUNGPUHNÜ Mosa ki tha, “Kheahang, inü nü Pharao ki Thrünpuh nangde kamshihdo; tüsho nü khiung Aron nü yo wukihrü thsübah.

²Inü nü ki thiyukhüm jihkhi alala nünü athabah; tüsho nü khiung Aronnü Israel mihtsürü api lo chingnü awukhiukshihpü Pharao ki thabah.

³Tüshe inü Pharao mulong müküpde akamshihbah, tüsho inü Ijip lo ching amütsanbo tüsho khinthiyinbebo alü kamshihshih she,

⁴Pharaonü nü ki manide alabah; judüki inü Ijip kheak I khah jipkihbah tüsho I yo bonungrü I mihtsürü Israelrü mahkhapkhi atonü Ijip lomi chingnü abekhitbah.

⁵Tüsho Ijip kheak I khah chungkihbah Israelrü arü bolungnü abekhitchoki Ijiprünü I ATUNGPUH de amükheahbah.”

⁶Tüsho Mosa le Aron bünenü ATUNGPUHNÜ thiyukhüm jihkhi nangde rhimo.

⁷Anenü Pharao ki asukchoki Mosa kam 80 tüsho Aron kam 83 azorü lakheah.

⁸Tüsho ATUNGPUHNÜ Mosa le Aron ki tha,

⁹“Pharaonü nüke ki, ‘Nükenü amütsan khülang huhang,’ de thasho, nünü Aron ki thabah, ‘Nü tso ju luang tüsho Pharao miki ayoshang, tüsho ju phuruto khülang kambah.’”

¹⁰Junangde Mosa le Aronnü ATUNGPUHNÜ thiyukhüm jihkhi nangde Pharao ki yü tüsho rhimo; Aronnü api tso Pharao tüsho ayamlarübo miki ayoshih tüsho ju phuruto khülang kam.

¹¹Tüshe Pharaonü she lümlung larü mihtsürü tüsho wurük-huhrü jide arü; junangde Ijip wurük-huhrübonü she arü wurüknü ju ruk thsü.

¹²Tümütüsho mihtsürü abannü nihbuh tso ayoshih tüsho jurübo phurutobo kam. Tüshe Aron tsonü arü tsobo muyuabah.

¹³Tütüshe ATUNGPUHNÜ athakhi nangde Pharao mulong müküpde kam tüsho apinü ane ki mani.

¹⁴Jumonü ATUNGPUHNÜ Mosa ki tha: “Pharao mulong müküplah; apinü mihtsürübo müyüshih.

¹⁵Pharao kilim yapsu yüang tümüde api ke lim yüchoh; nünü api shorupü keyean zhipang tüsho phuruto kamkhi tso nü khah ching shuhang.

¹⁶Tüsho nünü api ki thabah, ATUNGPUH Ibrirü Thrünpuhnü I nü kilim thiyia arüshih, I mihtsürü yüshang, junangde arünü sunglo ching I tankihbah; tüshe kheakü khiungde nünü mani.”

¹⁷ATUNGPUHNÜ ha thachoh, “Ha hode I ATUNGPUH ah de nünü amükheahbah: Kheahang, I khah ching shuhkhi tsonü inü Nile ke rhapbah, tüsho ju thiyih kambah,

¹⁸Nile ching thüngühbo shebah, tüsho Nile ju shuhrhüm münimde kambah Ijiprünü Nile ke muyungkhukde alabah.”

¹⁹Judüki ATUNGPUHNÜ Mosa ki tha, “Aron ki thaang, Nü tso luang tüsho Ijip ching ayungbo, kerubo, kedükim tüsho kekhip kumung nü khah chungkihang, junangde jurü thiyih kambah; tüsho Ijip lomi alala ching, sang le lung pangjiphüh chido ching thiyih labah.”

²⁰ATUNGPUHNÜ thiyukhüm jihkhi nangde Mosa tüsho Aronnü rhimo; Pharao le ayamlarübo mikinü apinü tso shuhkihbah Nile ke rhap, tüsho Nile ching lakhi ke alala thiyih kamabah.

²¹Nile ching thüngühbo sheabah; tüsho Nile ju shuhrhüm münimde kambah Ijiprünü Nile chingnü ke muyungkhuk; tüsho Ijip lomi alala ching thiyih lakheah.

²²Tüshe Ijip wurük-huhrübonü arü wurüknü ju ruk thsü; jumonü Pharao mulong müküpde kamlo, tüsho ATUNGPUHNÜ athakhi nangde apinü ane ki mani.

²³Pharaonü rholobah ayam ching yü, tüsho ha she api mulong ching mühan.

²⁴Jumonü Ijiprü alalanü ke yungpü thsungkheaknü ayung mükamde kiu, tümütüsho arünü ayung ke ju muyungkhukde alakheah.

²⁵Tüshe ATUNGPUHNÜ Nile rhapbah nimung thüne bankhit.