Read Yimchungru Naga Abe 8 Bible Online

Abe 8 - Yimchungru Naga bible

Abe 8

¹Tüsho ATUNGPUHNÜ Mosa ki tha, “Pharao ki yübah thaang, ‘ATUNGPUHNÜ ha thachoh: I mihtsürü yüshang, junangde arünü I tankihbah.

²Tüshe nünü arü müyüshihsho, kheahang, inü nü lomi alala kheangbonü athsümüchibah.

³Junangde kheangbonü Nile mithülambah, ju wukhiukbah tüsho nü yam ching, nü yo akhiungshakbo ching, nü yapkiu kheak, nü yamlarübo le nü mihtsürübo yam ching, tüsho phuru le phühbo ching arübah.

⁴Tüsho kheangbonü nü, nü mihtsürübo, tüsho nü yamlarübo kheak yükihbah.’”

⁵Judüki ATUNGPUHNÜ Mosa ki asuk, “Aron ki thaang, ‘Tso shuhbah nü khah ju yungzübo, ayungbo, kekungbo kumung chungkihang, tüsho Ijip lomi kheak kheangbo yükihshang.’”

⁶Jumonü Aronnü Ijip kebo kurungkheak akhah shuhkih; tüsho kheangbo atubah Ijip lomi lüpchimabah.

⁷Tüshe wurükhuhrübonü arü wurük hode ju ruk thsü, tüsho Ijip lomi kheak kheangbo hande arü.

⁸Judüki Pharaonü Mosa le Aron jibah tha, “I tüsho I mihtsürübo kheaknü kheangbo lude atsopü ATUNGPUH ki tamkhüntamnüang; tüsho inü mihtsürübo ATUNGPUH ki laksah-a kingaünpü yüshihbah.”

⁹Mosanü Pharao ki tha, “Nü tüsho nü yamlarübo le nü mihtsürübo thsungkheak tamkhüntamnüpü I ki asühde thiyukhüm jihang, junangde kheangbo ju nü kheak le nü yambo chingnü adükheakbah tüsho Nile ching lang aninga labah.”

¹⁰Tüsho Pharaonü tha, “Shido.” Mosanü tha, “Nünü athakhi ruk thsang, junangde ATUNGPUH isa Thrünpuh nangde she müla de nünü amükheahbah.

¹¹Kheangbonü nü le nü yambo tüsho nü yamlarübo le nü mihtsürübo kheaknü chamachihbah; arübo Nile ching lang aninga alabah.”

¹²Jumonü Mosa le Aronnü Pharao kinü wukhiuk; tüsho Mosanü ATUNGPUH ki apinü Pharao azhihde kheangbo handarükhi dünkheak zhi.

¹³Junangde Mosa yu yande ATUNGPUHNÜ rhimo; tüsho thüyambo le thüyam dükeakbo tüsho thulubo chingnü kheangbo ju sheabah.

¹⁴Arünü jurübo wumujung tüsho alo ju shuhrhüm münim.

¹⁵Tüshe küyimki Pharaonü keamramkhi ngükhea, apinü amulong müküplo tüsho ATUNGPUHNÜ athakhi nangde, apinü ane ki mani.

¹⁶Judüki ATUNGPUHNÜ Mosa ki tha, “Aron ki thaang, ‘Nü tso shuhkihang, tüsho alo rhapang, junangde Ijip lomi alala ching asungthulung ju kurheakbo kambah.’”

¹⁷Tüsho arünü jude thsü; tümüde Aronnü api tso shuhkihbah alo rhap tüsho asungthulungnü kurheakbo kambah mihtsürü le shiwüh kheak yükih. Ijip lomi alala ching asungthulung ju kurheakbo kamabah.

¹⁸Kheakü wurük-huhrübonü arü wurük hode kurheakbo ludarüpü thsü, tüshe arünü mukuk. Jumonü kurheakbo ju mihtsürü tüsho shiwühbo kheak lakheah.

¹⁹Judüki wurük-huhrübonü Pharao ki tha, “Ha Thrünpuhnü rhimoa lah.” Tüshe ATUNGPUHNÜ athakhi nangde Pharao mulong müküplode kam tüsho ane ki mani.

²⁰ATUNGPUHNÜ Mosa ki tha, “Yapsu mükikde asürang tüsho api ke lim yüchoki Pharao miki zhipang, tüsho api ki thaang, ‘ATUNGPUHNÜ ha thachoh, “I mihtsürü yüshang, junangde arünü I tankihbah.

²¹Nünü I mihtsürü müyüshihsho, inü nü le nü yamlarübo, nü mihtsürübo kheak tüsho nü yambo ching somünak boto arüshihbah. Ijiprü yambo tüsho arü zhipkhi alo alala somünakbonü amibah.

²²Tüsho ju nimung ching inü I mihtsürü lapung Goshen lomi somünak boto mülapü thsüde aningshihbah, junangde ha lo ching I ATUNGPUH de nüsanü amükheahbah.

²³Inü I mihtsürü le nü mihtsürü dükeak büthsübah. Ha amütsan shido labah.”’”

²⁴Tüsho ATUNGPUHNÜ jude rhimo. Pharao yam ching, ayamlarübo yam ching tüsho Ijip lomi alala ching somünaknü thsümünimjih.

²⁵Judüki Pharaonü Mosa tüsho Aron jibah tha, “Yüang, ha lomi ching nüsa Thrünpuh ki laksah-a kingaünang.”

²⁶Tüsho Mosanü tha, “Ha rhimopü alungki yung, tümüde isanü ATUNGPUH isa Thrünpuh kilim laksah-a kingaünkhi ju Ijiprü ki athraneanbe ah. Tüsho arü miki athraneanbe lakhi isanü laksah-a kingaün jihsho, arünü isa murusahba de?

²⁷Isanü nimung mahsam limtsahde sunglo ching yüanü tüsho apinü isa ki thiyukhüm jihkhi yande ATUNGPUH isa Thrünpuh kilim laksah-a kingaünanü.”

²⁸Tüsho Pharaonü tha, “Inü nüsa yüshihanü, junangde nüsanü sunglo ching ATUNGPUH nüsa Thrünpuh kilim laksah-a kingaünbah; nüsanü limshudü lang düyü. I thsungkheak tamkhüntamnüjang.”

²⁹Judüki Mosanü tha, “Kheahang, I nü kinü wukhiukchoh, tüsho inü ATUNGPUH ki tamkhüntamnübah, junangde Pharao, ayamlarübo, tüsho api mihtsürübo kheaknü shido somünak boto tsoabahbah. Tüshe kheaküa Pharaonü akeangyu thade mihtsürübo ATUNGPUH kilim laksah-a kingaünpü müyüshihde düthsü.”

³⁰Jumonü Mosanü Pharao kinü wukhiuk tüsho ATUNGPUH ki tamkhüntamnü.

³¹Tüsho ATUNGPUHNÜ Mosa yu yande rhimo; apinü somünak boto Pharao, ayamlarübo, tüsho api mihtsürübo kheaknü tsoshih. Khülang she maning.

³²Tüshe ha kim ching she Pharaonü amulong müküplode kam tüsho mihtsürübo müyüshih.