Read Yimchungru Naga Abe 9 Bible Online

Abe 9 - Yimchungru Naga bible

Abe 9

¹Judüki ATUNGPUHNÜ Mosa ki tha, “Pharao ki yüang tüsho thaang, ‘ATUNGPUH Ibrirü Thrünpuhnü ha thachoh: “I mihtsürübo yüshang, junangde arünü I tankihbah.

²Tüshe nünü arü müyüshihde judü lang tholosho,

³kheahang, ATUNGPUH khahnü thulu ching nü moshibo, khorabo, donkibo, kemelbo, moshipungbo, tüsho namfimihnubo kheak atrebe arüm hande arübah.

⁴Tüsho ATUNGPUHNÜ Israel akam-shiwüh tüsho Ijip akam-shiwüh dükeak büthsübah. Junangde Israelrü yo tümü she müshede alabah.”’”

⁵Judüki ATUNGPUHNÜ kim akhude tha, “ATUNGPUHNÜ lomi ching ha shido rhimobah.”

⁶Junangde ashidopü ATUNGPUHNÜ ha rhimo, tüsho Ijip akam-shiwüh alala sheabah; tüshe Israelrü akam-shiwüh khülang she müshe.

⁷Pharaonü yimakheahpü thiyia yüshih, tüsho Israelrü akam-shiwüh khülang she müshede alakheah. Tüshe Pharao mulong müküpde kam, tüsho apinü mihtsürübo müyüshih.

⁸ATUNGPUHNÜ Mosa tüsho Aron ki tha, “Nükenü mokin chingnü awah müyikhüh luang, tüsho Mosanü ju Pharao miki thüning lim sukang.

⁹Tüsho ju Ijip lomi alala ching asungthulung atsü nangde akambah, tüsho junü Ijip lomi alala ching mihtsürü le shiwüh kheak phanjakkhuhbo akhiukde mü kambah.”

¹⁰Jumonü anenü mokin chingnü awah lubah Pharao miki zhip, tüsho Mosanü thüning lim suka bah. Tüsho jurünü mihtsürü le shiwüh kheak phanjakkhuhbo akhiukbah mübo kam.

¹¹Tüsho phanjakkhuhbo akhiukkhinü wurük-huhrübonü Mosa miki müzhipkhuk, tümüde phanjakkhuhbo ju wurük-huhrübo tüsho Ijiprü alala kheak lakheah.

¹²Tüshe ATUNGPUHNÜ Pharao mulong müküpde kamshih; tüsho ATUNGPUHNÜ Mosa ki asukkhi nangde apinü ane ki mani.

¹³Judüki ATUNGPUHNÜ Mosa ki tha, “Yapsu mükikde asürübah Pharao miki zhipang tüsho api ki thaang, ‘ATUNGPUH Ibrirü Thrünpuhnü ha thachoh: “I mihtsürübo yüshang, junangde arünü I tankihbah,

¹⁴tümütüsho hakhip a inü arüm ju nü mulong ching, nü yamlarübo le nü mihtsürübo kheak arüshihbah, junangde alomi alala ching I ruk müla de nünü amükheahbah.

¹⁵Kheakü I khah chungkihbah nü tüsho nü mihtsürü kheak arümnü shikkhülaa, nüsa lomi ching dükheaka labah.

¹⁶Tüshe ha thsungkheaknü inü nü asürüshihkheah, junangde I wu nü kheak huhbah tüsho alomi alala ching I mung khipkhitbah.

¹⁷Kheakü khiungde nünü I mihtsürübo azhihchoh tüsho arü müyüshih.

¹⁸Kheahang, shido ha kim ching, atankihnü kheakü khiungde Ijip ching müdünjiakheahkhi arulung akishihbah.

¹⁹Jumonü kheakü akam-shiwühbo tüsho aleangkheak lakhi alala ku-alampung bede arang, tümütüsho aleangkheak lakhi mihtsürü tüsho shiwühbo kheak arulung keambah, tüsho arü ashebah.”’”

²⁰Pharao yamlarü bolung shepünü ATUNGPUH yu trekheanü ayamlarübo tüsho akam-shiwüh thüyambo ching yüzahshih.

²¹Tüshe shepünü ATUNGPUH yu akin mülakheanü api yamlarübo tüsho akam-shiwühbo aleangkheak zojih.

²²Judüki ATUNGPUHNÜ Mosa ki tha, “Nü khah thüning lim chungkihang, junangde Ijip lomi alala ching mihtsürü, shiwüh, tüsho thulu ching sangrung alala kheak arulung akibah.”

²³Tüsho Mosanü api tso thüning lim chungkih; tüsho ATUNGPUHNÜ tsüngmukde arulung akishih tüsho alo kheak chinchobe phürap. Junangde ATUNGPUHNÜ Ijip lomi kheak arulung akishih;

²⁴arulung aki tüsho chinchobe dunglim tüsho müngühlim phürap. Ha Ijip lomi alala ching trükshih khülang kambah arükhi dükeak ching mülangde aru shukhi khülang lakheah.

²⁵Ijip lomi alala ching aleangkheak lakhi mihtsürü tüsho shiwüh arulungnü king; tüsho mükeak ching sangrung tüsho sangdungbo kingshak.

²⁶Israelrü lapung Goshen lo ching lang arulung mülakheah.

²⁷Tüsho Pharaonü Mosa le Aron jibah tha, “Ha kim ching inü neak yihbeakdo. ATUNGPUH ju thiyurolungki tüsho I mihtsürübo le I mihbukmuyuk ah.

²⁸ATUNGPUH ki tamkhüntamnüang, junangde kheaküa tsüngmuk ato tüsho arulung mülade alabah, tümüde ha suhdo. Inü nüsa atsoshihbah, tüsho nüsa kheaküa mülalo.”

²⁹Tüsho Mosanü api ki tha, “I kiuto chingnü awukhiuk müleangnü, inü ATUNGPUH kilim I khahbo chungkihbah; tsüngmuk kheambah tüsho arulung mülade akambah, junangde alomi ju ATUNGPUH yo ah de nünü amükheahbah.

³⁰Tüshe nü le nü yamlarübo thsungkheak a nüsanü ATUNGPUH Thrünpuh mütreyi de inü mükheahlah.”

³¹Kheakü mükebün le barli thsümünim, tümütüsho barli müna lakheah tüsho mükebün pungde alakheah.

³²Tüshe wheat müthsümünim, tümüde ju ashulim münchoh.

³³Jumonü Mosanü Pharao kinü kiuto ching wukhiuk tüsho ATUNGPUH kilim akhahbo chungkih; jushu tsüngmuk tüsho arulung keamlo, tüsho alo kheak tsüng makide kam.

³⁴Tüsho küyimki tsüng, arulung tüsho tsüngmuk kheamkhi Pharaonü angükhea, apinü neak alü yihbeaklo; tüsho api le ayamlarübonü mulong müküpde kam.

³⁵Junangde Pharao mulong müküpde alakheah; ATUNGPUHNÜ Mosa hode athakhi nangde apinü Israelrü mütsoshih.