Read Yimchungru Naga Job 1 Bible Online

Job 1 - Yimchungru Naga bible

Job 1

¹Mihtsürü khülang Uz lomi ching amung Job de alakheah. Api ju mungchih mülarü tüsho alungki, Thrünpuh wüntrerü tüsho amütsü chingnü tsokhide alakheah.

²Api kilim tsührübo 7 tüsho tsührübebo 3 zübejih.

³Api namfimihnu 7000, kemel 3000, sangkaplak kihkhi moshipung dudu 500, donki 500, tüsho yamlarü ahihdo lakheah; junangde ha mihtsürü aniakhiuklim mihtsürü alala lung aladreto lakheah.

⁴Api tsührübonü thüyam abande aniojide kushimachih; tüsho arünü arü keoniorübo arü lung tsühyungshihpü jiyuk.

⁵Tüsho küyimki aniojikhi nimungbo tankihkhea, Jobnü arübo jibah müsühkhit, tüsho apinü yapsu mükikde asürübah arü khekhi yande taka kingaünkhi jih; tümüde Jobnü tha, “ Khükia I tsührübonü neak yihbeaka labah, tüsho arü mulong ching Thrünpuh athrua labah.” Hanangde Job nü kamruhroro rhimo.

⁶Nimung khülang yinmi mihtsürübo ATUNGPUH miki arü, tüsho Arimri she arü bolung arü.

⁷ATUNGPUHNÜ Arimri ki tha, “Nü küchingnü arükhea?” Arimrinü ATUNGPUH ki alo, “Alomi kheak yüla arüla dükhi chingnü, tüsho ju kheak yükihla akila dükhi chingnü.”

⁸ATUNGPUHNÜ Arimri ki tha, “Nünü I yamlarü Job mükheahkhitnah? Alomi kheak api nangde she müla, mungchih müla, Thrünpuh wüntrekhi tüsho alungki mihtsürü tüsho amütsü chingnü bahkhichoh.”

⁹Judüki Arimrinü ATUNGPUH ki alo, “Tümü mülakhi thsungkheak Jobnü Thrünpuh wüntrecho de?

¹⁰Nünü api le api yam tüsho api lakhi alala mükamde, thrip abande shahwün muyuk yung de? Nünü api khah rhimo müngühjih, tüsho api alakukrukbo lomi ching jakihdo.

¹¹Tüshe kheakü nü khah chungkhitang, tüsho api lakhi alala qiuang, tüsho apinü nü miro kheak athrubah.”

¹²ATUNGPUHNÜ Arimri ki tha, “ Khide tsülah, api lakhi alala nü wu ching lah, api azhihde nü khah lang düjipkih!” Jumonü Arimrinü ATUNGPUH mikinü wukhiuk.

¹³Nimung khülang api tsührübo tüsho tsührübebo akhiung azopü yam ching aniojide alachoki,

¹⁴yunithsürü khülang Job kilim arü tüsho tha, “Moshipungbo wochakde alakheah tüsho donkibo arü rheang ki yimkipde alakheah,

¹⁵Sabeanrübo arübah arü lubah tsodo, tüsho yamlarübo nukshangnü laksahdo; nü ki thapü I lang atsokhitkheah.”

¹⁶Apinü thade alachoki, püpürü arü tüsho tha, “Thrünpuh mo yinmi chingnü aki tüsho namfimihnubo le yamlarübo aniuabahdo; nü ki thapü I lang atsokhitkheah.”

¹⁷Api thade alachoki, püpürü arü tüsho tha, “ Kaldearünü bo mahsam thsübah kemelbo yande lubah tsodo, tüsho yamlarübo nukshangnü laksahdo; nü ki thapü I lang atsokhitkheah.”

¹⁸Api thade alachoki, püpürü arü tüsho tha, “Nü tsührübo le tsührübebo arü akhiung azopü yam ching aniojide alakheah,

¹⁹tüsho zukleangnü apung ato khülang loshelo hode arübah thüyam khuh phüyi kheak yün, tüsho athunurübo kheak keamkih tüsho arü sheabahdo; nü ki thapü I lang atsokhitkheah.”

²⁰Judüki Jobnü asürü, api yo shulünkhim thorüp, api ku hüt, tüsho alo kheak khukningbah kingaün.

²¹Apinü tha, “I be nuyam chingnü I bünkeang arükheah, tüsho I bünkeang yülobah; ATUNGPUHNÜ jih, tüsho ATUNGPUHNÜ lude tsodo; ATUNGPUH mung müngühmühi thsüshang.”

²²Ha alala ching Jobnü neak müyihbeak yungsho amülim rhimode Thrünpuh ki matsang.