Read Yimchungru Naga Job 10 Bible Online

Job 10 - Yimchungru Naga bible

Job 10

¹Inü I rhangdung thraneanlah; inü I zuzu thsüde I bahyukkhi thabah; inü I me khühde athabah.

²Inü Thrünpuh ki thabah; I dübahyuk; tümü thsükhi nünü I azhihchonü I ki mükheahshang.

³Ajunopü ju nü ki atsü a de, nü khah rhimo mükhemükimpü tüsho mihbukmuyuk lümkhi kheak asühba de?

⁴Nü a nü mük la de? Nünü mihtsürünü angükhi ruk ngüla de?

⁵Nü nimungbo ju ashebe nimungbo ruk a de, yungsho nü kambo ju mihtsürü kambo ruk a de,

⁶junangde nünü I mülimkhibo yimkhitcho de tüsho I neak yimcho de,

⁷I amülim mülakhi tüsho nü khah chingnü abekhitpü she müla de nünü mükheahkheah she?

⁸Nü khahnü I nungnü tüsho I thsü; tüsho kheakü nünü rholobah I thsümünimchoh.

⁹Nünü alo nangde I nungnüdo de lümkhitang; tüsho nünü I alo kamloshihba de?

¹⁰Nünü niuhke nangde I dungkhitkhi yung de, tüsho niuhke kingkung nangde kingkungshihkhi yung de?

¹¹Nünü I ju küp tüsho shihtsünü lüpdojih, tüsho robo le yinbo keakrujih.

¹²Nünü I rhangdung tüsho muzhodakkhi jih, tüsho nünü akümkhi hode I me kümkhit.

¹³Tütüshe hadürü nünü nü mulong ching ram; ha nü lümkhi lakheah de inü mükheahlah.

¹⁴Inü neak yihbeaksho, nünü I kheahchoh, tüsho I mülimkhi chingnü I müdükhe.

¹⁵I mihbukmuyuk dükhülaa, I ayokhe! I thiyuro lalashe, inü I ku mudukokhuk, tümüde I achihnü mide thsünükhi ching lah.

¹⁶Inü I ku dukosho mulong zahkhi kekhüzü nangde nünü I jim, tüsho I azhihde nünü mihmüyinsahbe rhimolo.

¹⁷Nünü I azhihde thiyumütsan aso kamshihchoh, tüsho I ki nü bukakhiukkhi alü kamchoh; I azhihde thirithsürü püpü nünü handarüchoh.

¹⁸Tümüde nünü I nuyam chingnü ayihkhitkhea? Khürü müknü I müngüyide I sheabahkhülaa!

¹⁹I mülakhülaa, nuyam chingnü kiuyuk ching hande yükhülaa tsüdo.

²⁰I rhangdung nimungbo anükhüh yung de? I langzü zojang, junangde I anikhüh sühakhimbah,

²¹aliudokhi lomi tüsho khide amiting lim küyimkishe murholobe ching I müyüyichokinü,

²²aliudokhi tüsho neamneamruru lomi, küpü ching ayin ju amiting ruk la. Zophar.