Read Yimchungru Naga Job 11 Bible Online

Job 11 - Yimchungru Naga bible

Job 11

¹Judüki Naamarü Zopharnü alo:

²Thiyubo hihdakde maloba de, tüsho hihde athakhinü khürü alungki kamshihba de?

³Nü keangthakhinü püpürü zhikde akamshihba de, tüsho nünü luhmünechoki khürünü nü mümüdanba de?

⁴Tümüde nünü tha, “Inü thsangyukhi atsangkhit ah, tüsho Thrünpuh miki I müsühlah.”

⁵Tüshe O, Thrünpuhnü thakhülaa, tüsho nü kilim amün khimshuhkhülaa,

⁶rama lakhi lümlung apinü nü ki thabah! Tümüde lümlung ju thrip ahihdo lah. Nünü alakmihkhi mukhiungdü lang Thrünpuhnü thsümüchichoh.

⁷Nünü Thrünpuh lümzülümdo-rhimo yimkhitkhukba de? Nünü Wuto akhü thsükhi yimkhitkhukba de?

⁸Jurü ju thüning kheaknü achangbe — nünü tümü thsükhukpü? Ashe-lomi kheaknü asükbe — nünü tümü mükheahkhukpü?

⁹Jurü akekhi ju alomi kheaknü ashangbe, tüsho keto kheaknü amülihbe.

¹⁰Api arübah nü rihyam ching binshihkhülaa, tüsho mahkhappü thsungkheak jimukhungkhülaa, shepünü api zhipdokhukpü?

¹¹Tümüde apinü mülapmüji mihtsürü mükheahlah; apinü mihbukmuyuk she ngülah. Apinü ju lümamükheahba de?

¹²Tüshe küyimki mütüm donkibonü mihtsürü atrebanü, makharü mihtsürünü anikhitbah.

¹³Nünü nü mulong langakinde zosho, tüsho api kilim nü khahbo chungkihsho;

¹⁴nü khah ching amülim lakhi limshude bahkhisho, tüsho nü yam ching mihbukmuyuk mülashihsho,

¹⁵tsükjide machihdü lang nü miro dukobah; am, nü düküngde alabah, tüsho mütre.

¹⁶Nünü nü küpkhuk mihabahbah; nünü ju ke bukde atsokhi nangdü lang alümkhitbah.

¹⁷Tüsho nü rhangdung ju animuro kheaknü ayinbe labah; nü mitingde lalashe yapsu nangde alabah.

¹⁸Tüsho nü tsoyukpung labah, tümütüsho ju ching mulonglam lah; nü kümdobah tüsho akhümkhitkhi ching nü sühakhim labah.

¹⁹Nü zuh-a yapbah, tüsho shenü nü mütreshih; ahihdonü nü arung lupü mürühbah.

²⁰Tüshe mihbukmuyuk mürüngmürakhibo amukuk ngübah; tsokhitpung limro alala chingnü arü akeangkeang kambah. Tüsho arü mulonglam ju arü rhangdung akheam thsübah. Job.