Read Yimchungru Naga Job 12 Bible Online

Job 12 - Yimchungru Naga bible

Job 12

¹Judüki Jobnü alo:

²Lümshangmang müla, nüsa mihtsürü ah, tüsho lümlung nüsa lungnü ashebah.

³Tüshe nüsa nangde I anikhitkhi lah; I nüsa kheaknü abukkhüpbe yung. Hadürü shenü mümükheahkhi la?

⁴I müyamrübo ki I a münedung khülang ah; inü Thrünpuh ki jibah apinü alojihjih she — thiyuro tüsho areak mükihde lalashe, I a münedung khülang ah.

⁵Nüsa küpkhuk müla tüshe nüsanü I kheah-a münejihchoh; angakpü thsüde alakhi mihtsürü ki nüsanü kingdo.

⁶Ahührü khimyambo a thsü tsüde lah, tüsho sherünü arü khah ching arü thrünpuh shuhbah Thrünpuh bukakhiukshihkheanü mütrede lah.

⁷Shiwühbo ki keoang, tüsho arünü nü thsangyubah; thüning wuhnubo ki keoang, tüsho arünü nü ki thabah;

⁸alomi ki keoang, tüsho arünü nü thsangyubah; tüsho keto ngühbonü nü ki khipkhita huhbah.

⁹Ha ATUNGPUH khahnü athsükheah de harü bolung shenü mümükheah le?

¹⁰Api khah ching rhangdung lakhi alala tüsho sheak thsükhi mihtsürü alala lah.

¹¹Münnü tsühyungbe tsühakheahkhi nangde, nükhünnü thiyubo soamükheah de?

¹²Lümlung ju ashinbuhrü kheak lah, tüsho anikhitkhi ju jingtsüpkutsüp kheak lah.

¹³Thrünpuh kheak lümlung tüsho sühmüh lah; api kheak lümthiyan tüsho anikhitkhi lah.

¹⁴Apinü kukruk khülang thsümünimsho shenü müthsülokhuk; apinü mihtsürü khülang ramyuksho shenü müdükhekhuk.

¹⁵Apinü ke tholosho, jurübo kungabahchoh; apinü dükhesho, jurünü alo kingdoabahchoh.

¹⁶Api kheak sühmüh tüsho lümlung lah; mülapyuka larü tüsho mülapyukjihrü chido api yo ah.

¹⁷Apinü yakzanshuhrü lümlung luakhinchoh, tüsho mahkhaprübo ju makharü kamshihchoh.

¹⁸Apinü kiulongthsürübo binkiu chingnü akishihchoh tüsho ramyukrü kamshihchoh;

¹⁹apinü amükeamrübo rhüka lubah tsochoh tüsho sühmüh larü thrimkhita bahchoh.

²⁰Apinü mulonglam mihtsürübo düsheak makhiukde kamshihchoh tüsho azothsürü kheaknü lümlung lude tsochoh.

²¹Apinü yakzanshuhrübo bahyukchoh tüsho sühmüh larü chimrümbe trünjihchoh.

²²Apinü amiting chingnü asük kukrukbo lokhitchoh, tüsho sükde amitingkhi ju ayin kamshihchoh.

²³Apinü trükshihbo sühmüh lade toshihchoh, tüsho apinü arü kukchoh tüsho dükheakshihchoh;

²⁴apinü lomi azothsürü kheaknü anikhitkhi lude tsochoh, tüsho limro mülakhi sunglo ching rümshihchoh.

²⁵Arübo ayin mülade amiting ching ajamchoh; apinü arübo amüshangrü nangde yingying lungde tsahshihchoh.