Read Yimchungru Naga Job 13 Bible Online

Job 13 - Yimchungru Naga bible

Job 13

¹Kheahang, I müknü ha alala ngüdo, I nükhünnü sodo tüsho anikhitdo.

²Nüsanü tümü mükheahlanü, inü she mükheahlah; I nüsa kheaknü abukkhüpbe yung.

³Tüshe inü Wutobuh ki asukbah, tüsho inü I dünkheak Thrünpuh ki asukachihpü künlah.

⁴Nüsa akeangyunü zhidorübo; nüsa alala müthülünkhi thümürübo ah.

⁵Nüsanü malandüpü lakhülaa, ju nüsa lümlung thsübah!

⁶Kheakü inü lümzülümdokhi aniang; tüsho inü amushukhi anijang.

⁷Nüsanü Thrünpuh thsungkheak akeangyu thaba de, tüsho api thsungkheak mülapyukde athaba de?

⁸Nüsanü api ki jakkheahba de, nüsanü Thrünpuh dünkheak mushuba de?

⁹Apinü nüsa yimkhitchoki nüsa atsüba de? Yungsho mihtsürü khülangnü püpürü mülapyukkhi ruk, nüsanü api mülapyukkhukba de?

¹⁰Nüsanü ramde jakkheahkhi huhsho, tsükjide apinü nüsa thürühbah.

¹¹Api wüntre-müretahnü nüsa mütreshihba de, tüsho api trekhi nüsa kheak makihba de?

¹²Nüsanü müchitmudukhibo ju awahbo ruk akeangkeang ah, nüsa tsungdobebo ju dujung lo tsungdobebo ah.

¹³Dalan, inü athabah tüsho tümü thsüthsü she I kheak arüshang.

¹⁴Küde thsah inü I shihtsü I hü ching müsümpü, tüsho I rhangdung I khah ching yukpü?

¹⁵Apinü I laksahsah she inü api kheak kinbah; junangde api miki I dünkheak inü athabah.

¹⁶Api ju I akhümkhit labah, tümüde rükthsürükheanrünü Api miki marü.

¹⁷I yubo kümkangde aniang tüsho inü akhipkhitkhibo nü nükhün ching lashang.

¹⁸Kheahang, inü I dünkheak thsakhamdo; I thiyuro labah de inü mükheahlah.

¹⁹Thrünpuhnü I thürühpü arücho de? Jude a sho I malannü tüsho ashebah.

²⁰I kheak mürhimopü mungji mahne mülüjang, tüsho nü miro kheaknü I müjik:

²¹I kheaknü nü khah tukloang tüsho nü atrebenü I dümüzün.

²²Jiang, tüsho inü alobah; yungsho inü asukshang, tüsho nünü I ki aloang.

²³I amülim tüsho I neakbo küdükhüh a? Inü alakpheankhi tüsho I neak I ki mükheahshang.

²⁴Tümüde nünü nü miro ramcho le, tüsho I nü riri khecho le?

²⁵Apungnü ayünkhi sangyü khülang nünü amüzünba de? tüsho müneang mukuh müshamba de?

²⁶Tümüde nünü I azhihde akhühbe thrütchoh, tüsho I athunuchoki amülim thsükhibo yimlushihchoh.

²⁷Nünü wuhrün liubonü I jingbo rhük, tüsho I jingdükü alala kheahchoh; nünü I jingshu aban phümütsanchoh.

²⁸Ashuhkhi kukruk nangde, arinü atsühkhi khim khülang nangde mihtsürü kheamchoh.