Read Yimchungru Naga Job 14 Bible Online

Job 14 - Yimchungru Naga bible

Job 14

¹Aliberünü azübekhi mihtsürü, nimung nüklah tüsho küpkhuknü milah,

²sangbün khülang nangde asürüchoh tüsho yiuhabahchoh, alamme khülang nangde tsochoh tüsho kheamabahchoh.

³Nünü hadürü khülang kheak nü mük kheahkihcho de? Nünü I nü lung mahkhappung ching bede yücho de?

⁴Shepünü mümüsühkhi chingnü amüsüh kukruk yihkhitkhukla? She müla.

⁵Tümütüsho api nimungbo akhukhita lah, tüsho api khinubo khekhi nünü mükheahlah, tüsho nünü akhüshak thsükhi apinü muhokhuk,

⁶mulomüthsürü khülang api nimung bankhi nangde, api sühakhimshihpü thsüde nü api kheaknü anguhde tsoang.

⁷Tümüde sangdung khülang thsungkheak mulonglam lah, kiushaksho ju achinlobah tüsho adübitbo mükheam.

⁸Aying ju alo ching chinkheama lalashe, tüsho ame alo ching shea lalashe,

⁹kenü apangkhi hode akhuh arübah tüsho sangji anini nangde akhahbo chinbah.

¹⁰Tüshe mihtsürü shechoh tüsho abukkhüp yapshihchoh; mihtsürü shechoh tüsho api küching la?

¹¹Keto chingnü kebo kheamkhi tüsho ayung ngahabahkhi nangde,

¹²junangde mihtsürü yapabahchoh tüsho alode masürü; thüningbo mülakhi khiungde, arübo masürü yungsho ayapkhi chingnü arü masürü.

¹³O nünü I Ashe-lomi ching jikshihkhülaa, nü bukakhiukkhi muhoyi khiungde nünü I jikshihkhülaa, junangde I lümkhitpü nünü kim akhukhitkhülaa!

¹⁴Mihtsürü khülang shebahle, api alode asürüba de? @POE TRY-3 = Tüshe inü kim atsübo aleangbah, @POE TRY-3 = ha thsümütsü kim kheamkhi khiungde aleangbah.

¹⁵Nünü ajibah tüsho inü nü ki alobah; nü khahnü arhimokhi dünkheak nünü mürheangbah.

¹⁶Junangde nünü I jingdükübo khechoh tüshe I neakbo müchinzhin;

¹⁷Inü alakmihkhibo qiuqiu ching düma zobah, tüsho nünü I mülimkhibo yihdoabahbah.

¹⁸Tüshe müzüngbo keamkhichoh tüsho züngthünakde tsochoh, tüsho lungto ayappung chingnü lahkhita lah;

¹⁹kenü lungbo mülünde tsochoh; düchibonü alo zünde tsochoh; junangde nünü mihtsürü mulonglam thsümünimchoh.

²⁰Nünü api azhihde kukchoh tüsho api lün thsungkheak tsoabahchoh; nünü api miro müthrichoh tüsho thiyia tsoshihchoh.

²¹Api tsührübo mungshimungthu ngüchoh tüshe apinü ju mümükheah; arü thokheamchoh tüsho ju mümükheahde yüchoh.

²²Tüshe apinü api pang thsükhi lang mütsanchoh, tüsho ju thsungkheak lang api me tüzhochoh.