Read Yimchungru Naga Job 15 Bible Online

Job 15 - Yimchungru Naga bible

Job 15

¹Temarü Eliphaznü alo:

²Lümlung larü mihtsürü khülangnü akeangkeang mükheahmudunü aloba de, tüsho aniakhiuklim pungnü api mishihba de?

³Arünü alü mülabe ching yungsho arünü atsü tümü müthsükhukbe yubo ching thaba de?

⁴Tüshe nü Thrünpuh trekhi chingnü tsochoh, tüsho Thrünpuh miki tamkhüntamnüpü zhipdochoh.

⁵Tümüde nü amülimbonü nü mün thsangyuchoh, tüsho nünü mulomülaprü mulo mokhitchoh.

⁶Nü münnü nü bahyukchoh tüsho I yung; nü münküpnü nü azhihde thiyumütsan jihchoh.

⁷Akhuh zübebuh ju nü a de? Yungsho awungbo müthrünyichokinü nü lakhea de?

⁸Nünü Thrünpuh lümzülümdokhi sodü de? Tüsho lümlung ha nü yo lang a de?

⁹Isanü mümükheahkhi nünü tümü mükheahla? Isanü mütsanmükhikhi nünü tümü anikhitla?

¹⁰Nü buh kheaknü azorübo, kubuyukrü tüsho shinbeshinbuh isa lung belah.

¹¹Thrünpuhnü shukheamkhi, tüsho nü ki mükhihde athakhi yubo khide ninila de?

¹²Tümüde nü mulongnü nü bede tsoshihcho le, tüsho tümüde nü mükjibo müzhingcho le,

¹³junangde nünü nü menü Thrünpuh azhihshihpü, tüsho hadürü yubo nü mün chingnü wukhiukshihcho le?

¹⁴Api amüsüh lakhukpü thsüde mihtsürü ju tümü a? Tüsho api thiyuro lakhukpü thsüde aliberünü azübekhi ju she a?

¹⁵Thrünpuhnü api yo amüsührü kheak she akin müla, tüsho yinmibo api mük ki amüsüh yung;

¹⁶Amülim-rhimo ke nangde ayungrü athranean tüsho athsümünimrü küdükhüh keamkhila!

¹⁷Inü nü ki thaanü; I ki aniang; tümü inü ngüdünü inü akhipkhitbah —

¹⁸tümü lümlung larübonü athakhea, tüsho arü jipürübonü müramkhea,

¹⁹sherü kilim lang alomi jihkhea, tüsho jaksorü sheshe arü bolung muho.

²⁰Mihbukmuyukrü shepünü lungchihchonü api rhangdung amuyung thsünüde alabah.

²¹Atrebe düsheakbo api nükhün ching lah; tsüde alachoki athsümünimrü api kheak arübah.

²²Api amiting chingnü arholopü akim müla, tüsho api nukshang thsungkheak akhujunga lah.

²³Apinü yikhap thsungkheak khiungke lim rümde thachoh, “Ju küching la”? Amiting nimung khah ki lah de apinü mükheahlah.

²⁴Küpkhuk tüsho thsünükhinü api müzünchoh; Kiulongthsürü khülangnü thirithsüpü thsakhamkhi nangde arünü api azhihde kukchoh.

²⁵Tümütüsho apinü Thrünpuh azhihde khah chungkihchoh, tüsho Wutobuh ki mütre,

²⁶api azhihde akheahmüngüp tsung shuhbah chungthülangdo alihchoh;

²⁷tümütüsho apinü api mirobo amüdangnü lüpdo, tüsho api shahmo kheak amüdang hanmukhung.

²⁸Api azhikkhi kiutobo, she mülapü lakhi, athsümünim mujung kampü akhujunga lakhi yambo ching labah;

²⁹api alarü mükam tüsho api lakhit mütsüp, yungsho api lakhit-kukrukbo lomi ching mubu.

³⁰Api amiting chingnü mutsokhi; motrunü api dübitbo yüngkungbah, tüsho api mün sheaknü api yünde atsobah.

³¹Apinü nihbuh thsungyukde, akeangkeang ching dükinshih; tümüde api akeangkeang ngülobah.

³²Api kim mukhiungyide api yiuhabahbah, tüsho api sangkhahbo phüyakdo mülashih.

³³Api ju aso mümünde aniungkhikhi kurungaso, tüsho abünbo ayokhikhi oliv sangdung nangde alabah.

³⁴Tümüde rükthsürükhean borü ju aniungyüh labah, tüsho buknim tsührü khimyambo monü aniuabahbah.

³⁵Arünü küpkhuk mihlachoh tüsho amütsü-rhimo zübechoh; tüsho arü nuyamnü mulomülap thsakhamchoh. Job.