Read Yimchungru Naga Job 16 Bible Online

Job 16 - Yimchungru Naga bible

Job 16

²Inü hadürü hihde sodo; nüsa alala küpkhukrü shukheamrü ah.

³Apung yünkhi yubo athürün müla de? Yungsho nüsa judü lang athashihpü tümünü bukakhiukshihcho?

⁴Nüsa I ruk ha lakhülaa, inü she nüsa ruk thakhukbah; nüsa azhihde inü thiyu zhidode athabah tüsho nüsa kheak I ku angambah.

⁵I münnü nüsa düküngshihbah tüsho I münküpnü shukheamkhinü nüsa mulong rozhak sühakhimshihbah.

⁶Inü thatha she I thsünü mükeam, tüsho inü arümrüm she junü küdükhüh I bahbah tsode?

⁷Tsükjide kheakü Thrünpuhnü I phuliuhshihdo; apinü I yamkhün alala thsümünimdo.

⁸Tüsho apinü I mukuhshihdo, küpü I azhihkhi thiyumütsan la; I trukkhitdo tüsho I azhihde thiyumütsan thsüchoh.

⁹Apinü abukakhiukde I thothünak tüsho I thraneando; apinü I kheak azhihde ahü mütrüt; I ririnü I azhihde juh-a kheahchoh.

¹⁰Arünü arü mün kade I kheak kheahdo; arünü mükhemükimde I müchip kheak dam; arünü I azhihde shomukhung.

¹¹Thrünpuh nü I rükthsürükhean kilim jihabahdo; tüsho mihbukmuyuk khah ching I jihabahdo.

¹²I zuzu thsüde alakheah, tüsho apinü I mahne kamde yihnak; apinü I hung kheaknü I thünit tüsho adütre kamde yihthünak; apinü I anihbuh münchidung kamshih;

¹³api hühzo-kiprünü I mükamdo. Apinü I mügeibo kheankhitjih, tüsho mihmüthsüm muhuh; apinü I su alo kheak bukkhitshih.

¹⁴Apinü I kheakü kheakü yurijih; apinü I kheak athrungrü khülang nangde nanachihchoh.

¹⁵Inü I küp kheak shungliukhim thürekih, tüsho I ku asungthulung ching yap.

¹⁶Atrekhinü I miro münkhia lah, tüsho I mükküpbo kheak amiting ato lah,

¹⁷I khah ching thiyih bukkhi mülalashe, tüsho I tamkhüntamnü tsangkhitde lalashe.

¹⁸O alomi, I thiyih lüpdoa dübah; inü thiyuro zhikhi dükheamshih.

¹⁹Kheaküshe, dükde, I yumütsan yinmi ching lah, tüsho I dünlim chibuh achang kheak lah.

²⁰I müyamrübonü I kheahmüchihchoh; I mükbonü Thrünpuh kilim chike bukkhitchoh,

²¹Mihtsürünü müyamrü thsungkheak mushukhi nangde khürünü I thsungkheak Thrünpuh ki mushujihkhülaa.

²²Tümüde küyimki kam anükhüh akheam thsübanü, alode marüpü limro ching I yübah.