Read Yimchungru Naga Job 17 Bible Online

Job 17 - Yimchungru Naga bible

Job 17

¹I me thsümünimabahdo, I nimungbo khihabahdo, I thsungkheaknü kiuyuk thsakhamlah.

²Tsükjide luhmünerü I mükamde lah, tüsho I kheak bukakhiukrü inü kheahde lah.

³I thsungkheaknü nü kheak thiyuchihchim khülang zojang; I thsungkheaknü tsungdojihrü shepü la?

⁴Tümütüsho anikhitpü arü lümkhi nünü yihdojih, jumonü nünü arü ki akuk müngüshih.

⁵Sherünü thsambah thsungkheaknü müyamrübo thsungyukbanü arü tsührübo mük tukabahbah.

⁶Apinü I mihtsürübo münedung kamshih. Tüsho arünü arübah I miro kheak mükeke mukhiukkihchoh.

⁷Mulong tukthsükhinü I mükji rerede kamdo, tüsho I jingkhah alala me khülang ruk ah.

⁸Alungkirünü ha kheak müyinsahchoh, tüsho tümü yak mümükheahrünü Thrünpuh mümükheahrü ah de I bahyukchoh.

⁹Tütüshe thiyuro larünü arü limro tholochoh, tüsho khah müsühde alarü alü reangzahde kamshihchoh.

¹⁰Tüshe kheakü nüsa alala alode arang, tüsho nüsa bolung lümlung larü mihtsürü ngüpü yung.

¹¹I nimungbo hoabahdo, I mulongnü akünkhi I lümkhibo thsümünimdo.

¹²Arünü azhing ju animung kamshih; amiting ching arünü thachoh, “Ayin thüninde lah.”

¹³Ashe-lomi ju I yam nangde inü kheahsho, amiting ching inü I yapkiu khimsho,

¹⁴inü alokhün ki, “Nü I buh” de thasho, tüsho ari ki, “I be yungsho I chi” de thasho,

¹⁵dale tüsho I mulonglam küching la? Shepünü I mulonglam khürü ngüba?

¹⁶Ju Ashe-lomi ripit ching yüzahba de? Isa rukhühnü asungthulung ching yüzahba de?