Read Yimchungru Naga Job 18 Bible Online

Job 18 - Yimchungru Naga bible

Job 18

¹Shuhairü Bildadnü alo:

²Külokhüh nünü thiyu jimba? Lümakheahang, tüsho jushu isanü asukbah.

³Tümüde isa shiwüh nangde khecho? Tümüde nü mük ki isa makharü nangde lümcho?

⁴Nü shepünü bukakhiukkhi ching nihbuh zangrü yurichonü — nü dünkheaknü alomi bahyukba de, yungsho ayappung chingnü lungto lahkhitba de?

⁵Tsükjide mihbukmuyuk ayin yihmütdo tüsho api motru müyin.

⁶Api khimyam ching ayin mitingde lah tüsho api kumung tsünpung yihmütdo.

⁷Api jingdükü amürangbo khihabahdo tüsho api lümkhinü api keamshihdo.

⁸Tümüde api jing keang ching tsahyuka tholoa lah.

⁹Api lahzhi kheaknü azheangnü phuhchoh; qimüripnü api sükloa lah.

¹⁰Api thsungkheak liu khülang alo ching ramlah, api thsungkheak limro ching azheang thsüjihlah.

¹¹Athrip abande atrebenü api müzünchoh, tüsho api lahzhi kheak müthsakkihlah.

¹²Akhümkhinü api sühmüh müladebahdo, tüsho api rheang ki athsümünimpü thsakhamlah.

¹³Tukthsünü api küp tsühabahdo, tukthsümükhiknü api jingkhahbo tsühkhamchoh.

¹⁴Apinü mulong tode alakhi khimyam chingnü api thonakdo, tüsho mihtrebe kiulongthsüpuh ki bede arüdo.

¹⁵Api khimyambo ching tümü maning; kelülülung api lapung kheak hiumüzüta lah.

¹⁶Api ying alunglim kunga lah, tüsho kumung lim api sangkhahbo yiuh-a lah.

¹⁷Api lümkhilümduhbo alomi chingnü dükheakchoh, tüsho mungthu bolung api mung müla.

¹⁸Api ayin chingnü amiting ching nimyukdo, tüsho alomiküp chingnü yankhita bahdo.

¹⁹Api mihtsürü bolung api tsührü yungsho tsühsoniuso müla, tüsho api lade alakhi ching sheshe rhangdung müla.

²⁰Aniyüzahlimrünü api kheak müyinsahdo, tüsho mihtrebenü aniakhiuklimrü ramchoh.

²¹Tsükjide hadürü ha mihbukmuyuk lapung ah, ha Thrünpuh mümükheahrü lapung ah.