Read Yimchungru Naga Job 19 Bible Online

Job 19 - Yimchungru Naga bible

Job 19

²Külokhüh nüsanü I me thsümüchiba, tüsho thiyubonü I adütre kamshihba?

³Ha thürü ki nüsanü I kheak mükhemürangchoh; I amülim jihpü nüsa machih de?

⁴Tüsho inü alakmihkhi atsütsü laa lasho, inü alakmihkhi I kheak lah.

⁵Nüsanü I kheaknü atsübe ah de lümchoh tüsho I küpkhukkhi ha I mülimkhinü ah de lümchoh,

⁶dale tüsho Thrünpuhnü I amülim ching yüzahshih, tüsho mükamde api keangnü phudodo de mükheahang.

⁷Inü lakmihdo de zhizhi she I ki malojih; inü achangnü ji, tüshe thiyuro müla.

⁸Apinü I limro rhünü khiungdokhi hode I muhokhuk, tüsho apinü I limro kheak amiting zojih.

⁹Apinü I mungthu I kheaknü yihkhia ludo, tüsho I ku kheaknü kuthran ludo.

¹⁰Apinü thrip abande I thsümünimdo tüsho I tsodo, sangdung khülang nangde apinü I mulonglam rukkhitdo.

¹¹Apinü I azhihde alü bukakhiukdo, tüsho I api riri nangde khechoh.

¹²Api bonungrü rukhühnü arüchoh; arünü I azhihde limro thsakhama lah, tüsho I khimyam mükamde binlah.

¹³Apinü I keoniorübo I kheaknü limshude zojihlah, tüsho I mükheahachihrübo I ki jakso lah.

¹⁴I buhtsührübo tüsho I müyamrü khungbonü I mihdo;

¹⁵I yam ching larü hanrübonü I mihabahdo; I yamlaberübonü I hanrü nangde khechoh; arü mük ki I khiungkerü nangde kamabahdo.

¹⁶Inü I yamlabuh ki ji, tüshe apinü I ki malojih; inü lang api kheak mushupü kamchoh.

¹⁷I niubenü I sheak thsükhi mümünimkhuk; I tsührü khungbo ki I athraneanbe lah.

¹⁸Azürü anininü she I mükhemükimchoh; küyimki I asürübanü arünü I azhihde thachoh.

¹⁹I müyamrü khung alalanü I thraneanchoh, tüsho inü muzhode alarünü I azhihde rholodo.

²⁰I robo I küpnü lang muhiudobah lah, I arothsünnü rhangdung lah.

²¹I ki muzhoang, I ki muzhoang, O nüsa I müyamrübo, tümüde Thrünpuh khahnü I qiudo!

²²Tümüde nüsanü Thrünpuhnü nangde I thsümüchicho, I shihnü nüsa reangmükeam de?

²³O I yubo thrütkhülaa! O jurü hüm ching thrütyukkhülaa!

²⁴Jurü yinchi-dosang tüsho yinchikenü lünnü lungto kheak thrütkihkhülaa!

²⁵Tümüde I Rhokhitrü rhangdung lah de inü mükheahlah tüsho akheam ching api alomi kheak zhipbah;

²⁶tüsho I küp ha thsümünimshu, I shih hanü inü Thrünpuh ngübah,

²⁷I thsungkheak inü api ngübah tüsho I müknü akheahbah, @POE TRY-3 = tüsho püpürü yung. @POE TRY-3 = I pang ching I mulong keahkhichoh!

²⁸Nüsanü, “Isanü küde thsah api thsümüchipü!” tüsho, “Judürü ying api kheak lah” de thasho;

²⁹nukshang treang, tümüde bukakhiukkhinü nukshang thsümüchi hande arüchoh, junangde ju ching mahkhap lah de nüsanü amükheahbah.