Read Yimchungru Naga Job 2 Bible Online

Job 2 - Yimchungru Naga bible

Job 2

¹Nimung khülang yinmi mihtsürübo ATUNGPUH miki arü, tüsho Arimri she arü bolung ATUNGPUH miki arü.

²ATUNGPUHNÜ Arimri ki tha, “Nü küchingnü arükhea?” Arimrinü ATUNGPUH ki alo, “Alomi kheak yüla arüla dükhi chingnü, tüsho ju kheak yükihla akila dükhi chingnü.”

³ATUNGPUHNÜ Arimri ki tha, “Nünü I yamlarü Job mükheahkhitnah? Alomi kheak api nangde she müla, mungchih müla tüsho Thrünpuh wüntrerü alungki tüsho amütsü chingnü bahkhichoh. Amüdopü mülade api thsümünimpü api azhihde nünü I athsungthsung she apinü judü lang thiyuro lah.”

⁴Judüki Arimrinü ATUNGPUH ki alo, “ Küp thsungkheak küp! Mihtsürünü anihbuh rhangdung khümkhitpü thsungkheaknü api lakhi alala jihbah.

⁵Tüshe kheakü nü khah chungkhitang tüsho api ro le yin qiuang, tüsho apinü nü miro kheak athrubah.”

⁶ATUNGPUHNÜ Arimri ki alo, “ Khide tsülah, api nü wu ching lah; api rhangdung lang lashang.”

⁷Jumonü Arimrinü ATUNGPUH mikinü wukhiuk, tüsho api müphü kheaknü thangphülang khiungde Job kheak münü mide kamshih.

⁸Jobnü amü hütpü phühkheam lu, tüsho awah ching bin.

⁹Judüki aniubenü api ki tha, “ Kheaküshe nü thiyuro ching laba de? Thrünpuh athruang, tüsho sheang.”

¹⁰Tüshe apinü anihbe ki tha, “Mudukmüke liberü nangde nünü thachoh. Isanü Thrünpuh khah chingnü atsü leangkhibah amütsü müleangkhiba de?” Ha alala ching Jobnü amün hode neak müyihbeak.

¹¹Kheakü küyimki api kheak harü küpkhukbo arükhi Job müyamrü mahsamnü asokhea, mihbüm abannü nihbuh yam chingnü tsahmusu — Temarü Eliphaz, Shuhairü Bildad, tüsho Naamarü Zophar. Arünü yübah api lung tüzhopü tüsho shukheampü shoruachih.

¹²Küyimki arünü api limshu chingnü angükhea, arünü api mükheahmütsan, arünü arü düsheak akhiuk tüsho achangnü trip; arünü atüzhokhi huhpü arü shulünkhimbo thorüp tüsho arü ku kheak asungthulung kamkih.

¹³Arünü api lung nimung thüne tüsho tsüngre thüne alo kheak bin, tüsho shenü she api ki thiyu khülang she mütha, tümüde api thsünü khide tolah de arünü ngü.