Read Yimchungru Naga Job 20 Bible Online

Job 20 - Yimchungru Naga bible

Job 20

¹Naamarü Zopharnü alo:

²Aniang! I küpkhuk lümkhinü alopü athsungchoh; tümütüsho I khide phü mushulah.

³I mütamde mükhemükimkhi inü sochoh, tüsho I anikhitkhi menü ju aloshihchoh.

⁴Ha adüsonü alomi kheak mihtsürü lashihchokinü ah de nünü mümükheah de,

⁵mihbukmuyuk asühpü khihlah, tüsho Thrünpuh mümükheahrü asühachihpü kim anükhüh lang ah?

⁶Apinü thüning khiungde künkihkih she, tüsho api kunü amobo khiungkhiung she,

⁷api nihbuh khih nangde lünnü adükheakbah; sherünü api ngüdünü athabah, “Api küching la?”

⁸Api milim khülang nangde phinde atsobah tüsho müngü; azhing michih nangde arübo kheamabahchoh.

⁹Api ngükhi müknü api müngülo yungsho api lapungnü api müngülo.

¹⁰Api tsührübonü zhochihrü ki kakheangbah, tüsho api khahnü anihbuh lakhit jihlobah.

¹¹Api robo athunu sühmühnü amikhi asungthulung ching yapbah.

¹²Mihbukmuyukkhi api mün ching niungniung she, apinü ju amulo khüp ramram she,

¹³apinü ju wukhiukshihpü mükünkün she, tüsho amün ching müngümsho,

¹⁴tütüshe api jim ju aho ching sande kamchoh; ju api kheak müzüm phuruto labah.

¹⁵Apinü lakhit muyuchoh tüsho mülümkhitloa bahchoh; Thrünpuhnü api buk chingnü wukhiukshihchoh.

¹⁶Apinü phuruto müzüm dukbah; phuruto mulonü api mukiusahbah.

¹⁷Apinü mukhuke tüsho niuhke bukkhi yungbo müngü.

¹⁸Api khikhi sangaso mütsühde ajihlobah tüsho ju mumuyu; api yinzüyindokhi alü chingnü api reangkeamkhi müngü.

¹⁹Tümüde apinü zhochihrü juno tüsho bahyuk, apinü müthsükhi yam khülang yankhia lu.

²⁰Api mulong ching keamramde mülakhi apinü mükheahlah; apinü akümkhi tümü she muzokhit.

²¹Apinü tsühabahshu tümü she maning, jumonü api lalimlako tsükhi mütsüp.

²²Api müleamde suhdahkhi ching api lümthsünü ching labah; thsümütsü thsungkhi alala api kheak arübah.

²³Api buk thsüde amishihpü Thrünpuhnü api bukakhiukkhi api kheak arüshihbah, tüsho api tsühyungchoki api kheak keamkihshihbah.

²⁴Api yinchi thsühnuk kheaknü atsobah; müwayinchi hühzonü api düchipashungbah.

²⁵Ju api düthsün chingnü thokhitchoh, tüsho api su chingnü azhingzhing athsokih-a akhiukchoh; atrebe api kheak arüchoh.

²⁶Abümnü amiting api rahpung thsungkheak zolah; shenü müyüntrukhi monü api muliuabahbah; api khimyam ching tümü aninga lanü aniuabahbah.

²⁷Yinmibonü api mülimkhibo lahkhitbah, tüsho alominü api azhihde wusubah.

²⁸Api lakhit alala thsümünimbah, Thrünpuh bukakhiukkhi nimung düchinü zünde atsobah.

²⁹Ha mihbukmuyuk shihcham Thrünpuh kilimnü lah, Thrünpuhnü api thsungkheak yamrüplurüp thsakhamkhi lah.