Read Yimchungru Naga Job 22 Bible Online

Job 22 - Yimchungru Naga bible

Job 22

¹Temarü Eliphaznü alo:

²Mihtsürü khülang Thrünpuh ki yihnüpü lakhukba de? Lümlung larü she api ki alü thsükhukba de?

³Nü thiyuro lamonü Wuto ki tümükhüh asühpü la de, yungsho nü limrobo jakreak mükihkhinü api ki alü la de?

⁴Nünü api tremonü apinü nü thürühcho de, tüsho nü kheak mahkhapcho de?

⁵Nü mihbukmuyukkhi tolah yung de? Nü mülimkhi akheam müla.

⁶Tümüde nünü amütsan mülade nü keoniorü kheaknü thiyuchihchim ludo, tüsho arü khimmih khukjihde bünkeang kamshih.

⁷Nünü keakzungrü ki ayungpü ke müjih, tüsho nünü akhümrü ki yikhap mükip.

⁸Tüshe wulakhi mihtsürü alopung lah tüsho wüntre mihtsürü ju ching lah.

⁹Tüsho nünü khimoberübo khahkeang tsoshih, tüsho mürerü bin thsümünimjih.

¹⁰Jumonü qimüripbo nü mükamde lah, tüsho zukleang trebenü nü müzünchoh,

¹¹yungsho nünü müngükhukpü thsüde amiting lah; kekingnü nü zündochoh.

¹²Thrünpuh a achangbe yinmibo ching müla de? Achangbe chiningbo kheahang, arü küdükhüh changla!

¹³Jumonü nünü thachoh, “Thrünpuhnü tümü mükheahla? Apinü amiting asük hode mahkhapkhukba de?

¹⁴Amo akheahnü api hingdoa lah, jumonü apinü müngü, tüsho api yinmibo ku mühikhi kheak tsahchoh.”

¹⁵Mihbukmuyuknü ajungkhi awün limro ching nünü ayanba de?

¹⁶Arübo arü kim mukhiungde tsoabahdo; arü khimtanbo kekingnü müsühabahdo.

¹⁷Arünü Thrünpuh ki tha, “Isa zangrü zojang,” tüsho “Wutobuhnü isa ki tümü thsükhukpü?”

¹⁸Tütüshe apinü arü yambo kukruk atsünü mishih — tüshe mihbukmuyuk lümkhibo I kheaknü limshude lah.

¹⁹Thiyuro larünü ju ngüchoh tüsho asühchoh, tümü yak mümükheahrünü arü ki kheahmüchihde münejihchoh:

²⁰“Tsükjide isa riribo dükheakdo tüsho arü lakhit monü takabahdo.”

²¹Thrünpuh kheak arihang tüsho mungtsü ching laang; hanangde atsü nü ki arübah.

²²Api mün chingnü thsangdankhi leangkhiang, tüsho api yubo nü mulong ching zoang.

²³Nünü Wutobuh kilim rholosho nü lalobah, nünü nü khimyambo chingnü thiyuro mülakhi yihkhita bahsho,

²⁴nünü suna ju asungthulung nangde tüsho Ophir suna ju ayung ching lungbo nangde khesho,

²⁵tüsho Wutobuh ju nü yo suna tüsho shotoyinchi thsüsho,

²⁶nünü Wutobuh kheak asühbah tüsho nü miro Thrünpuh ki dünkhitbah.

²⁷Nünü api ki tamkhüntamnüba tüsho apinü nü ki anibah, tüsho nünü thiyuchihchimkhibo jihbah.

²⁸Nünü tümükhüh khipkhitbah tüsho ju nü thsungkheak labah tüsho ayinnü nü limrobo kheak yinshihbah.

²⁹Thrünpuhnü akükheangrü thokhichoh tüsho azhihayihrü khümkhitchoh.

³⁰Apinü yakli mümükheahrü she abekhitbah; nü khah müsühkhi hode arübo tsokhitbah.