Read Yimchungru Naga Job 24 Bible Online

Job 24 - Yimchungru Naga bible

Job 24

¹Tümüde Wutobuhnü mahkhappü kim muzocho le, tüsho tümüde api mükheahrünü küyimkishe api nimungbo müngü le?

²Mihtsürübonü arelungbo luakhindo; arünü mihnu boto ahüh-a yimkipchoh.

³Arünü mürerü donki kita bebah tsochoh; arünü arhokhitpü thiyuchihchimde khimoberü moshipung luchoh.

⁴Arünü küpkhukrü limro chingnü nimkhita bahdo; lomi ching zhochihrü arochihde jikshihdo.

⁵Mütüm donki nangde loshelo ching arü rhimo ching tsühyungbe yimpü yüchoh, sunglobonü arü tsührübo thsungkheak tsühyungbe jihchoh.

⁶Arünü mührü lu ching yimluchoh tüsho mihbukmuyukrü kurungasolu ching amüdre mochoh.

⁷Arünü khim müyihde tsüngre amuyung yapchoh, tüsho athsak ching lüpdopü müla.

⁸Arübo awungbo kheak lünkihkhi tsüngnü pangchoh, tüsho ku alampung yimde lungto lim müjimde yüchoh.

⁹Khürünü mürerü khungarübo azhorü kamshihchoh, tüsho arhokhitpü thiyuchihchimde zhochihrü tsührübo luchoh.

¹⁰Zhochihrü khimmih müyihde bünkeang yüchoh; khümkhüm she arünü hiphung hanchoh;

¹¹arünü müdangke thsungkheak olivbo nitkhitchoh; arünü kurungaso chingnü yukhu nitkhitchoh; tüshe arübo kethürilah.

¹²Kiutobo ching yurirü tüsho ashepü larübonü arung thsungkheak zhichoh, tüshe Thrünpuhnü arü tamkhüntamnükhi manijih.

¹³Khürünü ayin azhihchoh, arünü ju limro mümükheah tüsho ju limrobo ching müyü.

¹⁴Mihlaksahrünü zhochihrü tüsho mükheakmürakrü laksahpü mükikde asürüchoh tüsho azhing ching ahührü nangde lah.

¹⁵Müzammüramrü müknü she shuhyini aleangde thachoh, “She müknü I müngü”; tüsho apinü amiro müthrichoh.

¹⁶Animung arünü kheahyuka zokhi azhing ching arünü thüyambo chakchoh; arünü ayin mümükheah.

¹⁷Tümüde kheahde amitingkhi ju arü alala thsungkheaknü yapsu ah; arünü atrebe amiting kheak müyamrü thsüchoh.

¹⁸Ke mi kheak phungrü ju arü lah; lomi ching arü shihcham ju muthrumüneana lah; anitrü shenü she arü kurungasolubo ching müyü.

¹⁹Akung tüsho ataknü aru kebo kheamshihchoh; junangde Ashe-lominü neak yihbeakrü kheamsihchoh.

²⁰Nuyamnü arü mihabahchoh; aribonü arü tsühabahchoh; arü mülümkhitlo; junangde mihbukmuyuk sangdung khülang nangde zhakchoh.

²¹Arünü aniungyüh liberü kheahmüchihchoh, tüsho khimoberü ki atsü mürhimo.

²²Tüshe Thrünpuhnü wuto ju api wunü thoa luchoh, api wusuchoh tüshe mihtsürü sheshe mütsanmükhikhi müla.

²³Apinü arü kilim tsokhitpung jihchoh tüsho arü tsunglolah; api mükjibo arü limrobo kheak lah.

²⁴Anükhüh kheak thsungkheak arü shuhkih-a lah; tüsho arübo tsoabahdo; arü yiuhabahchoh tüsho püpürü nangde keamkhiabahchoh; arübo hi ye nipshakkhi nangde kungabahchoh.

²⁵Jude yungsho, I akeangyu tharü ah de tüsho inü athakhi ching tümü müla de shepünü mütsanjihba?