Read Yimchungru Naga Job 27 Bible Online

Job 27 - Yimchungru Naga bible

Job 27

¹Jobnü kheaküshe api yu tankih tüsho tha:

²Thrünpuh lale, shepünü I ki thiyuro lude tso, tüsho Wutobuh, shepünü I me khühde kamshih.

³I sheak I kheak lakhi khiungde tüsho Thrünpuh sheak I nupung ching lasho,

⁴I münnü akeangyu masuk tüsho I mulonü mülapyukde mütha.

⁵Nü alungki ah de inü küyimkishe mütha; I she khiungde thiyuro I kheaknü müdükhe.

⁶Inü thiyuro-lungki düngdüng ramlolah tüsho inü ju mutsoshih; I lakhi khiungde I mulongnü I müthürüh.

⁷I riri ju mihbukmuyuk nangde lashang, tüsho I azhihrü ju thiyuro mülarü nangde lashang.

⁸Rükthsürükheanrünü hihde alü thsüthsü she Thrünpuhnü api rhangdung lude tsosho api tümü la?

⁹Api kheak küpkhuk arüchoki Thrünpuhnü api zhikhi soba de?

¹⁰Apinü Wutobuh kheak asühba de? Apinü kim alala ching Thrünpuh ki jiba de?

¹¹Thrünpuh wu tokhi dünkheak nü ki inü thsangyubah; Wutobuh kheak lakhi lümkhi inü müram.

¹²Nüsa alalanü nüsa thsungkheak ngüdo; dale küde thsah nüsa rukhühnü mudukmükerü kamkhea?

¹³Ha Thrünpuh kilim mihbukmuyuk shihcham, tüsho junorünü Wutobuh kheaknü aleangkhikhi yamrüplurüp lah:

¹⁴Arü tsührübo busho, ju nukshang thsungkheak ah; tüsho arü münübo suhdahde atsühpü müla.

¹⁵Sherü aninga labanü tukthsünü ashebah, tüsho arü khimoberünü mütüzho.

¹⁶Apinü asungthulung nangde shotoyinchi wumujungjung she, tüsho dujunglo zhihzhih nangde khimmih rhungkihkih she —

¹⁷apinü ju rhungkihbah, tüshe thiyuro larünü aphuyubah, tüsho amülim mülarünü shotoyinchi chama lubah.

¹⁸Apinü wuhnu sapbo nangde api yambo aheangrünü athsükhi yünshimbo nangde thsüchoh.

¹⁹Api lakhita yapchoh tüshe mühanmukhunglo; apinü api mük rheakchoh tüsho ju tsoabahdo.

²⁰Atrebebonü keking nangde api alihhochoh; azhing ching chitmüheannü api yünde tsochoh.

²¹Aniakhiuklim pungnü api yünkihchoh tüsho api tsoabahdo; junü api lapung chingnü phüta bahdo.

²²Api kheak amuzho mülade yüna bahchoh; api ku koyubah ju wu chingnü tsochoh.

²³Junü api kheak khah damchoh, tüsho ju dangpung chingnü api kheak ish thsüchoh.