Read Yimchungru Naga Job 28 Bible Online

Job 28 - Yimchungru Naga bible

Job 28

¹Tsükjide shotoyinchi thsungkheaknü akhiukpung lo, @POE TRY-4 = tüsho suna tsangkhitpü dangpung lah.

²Yinchi ju alo chingnü yihkhit tüsho shoto zhingzhing ju lung chingnü niu.

³Mihtsürünü amiting asük khiungde yimdo. Apinü alo asük ching yimdo tüsho amiting ching lungbo khündo.

⁴Apinü mihtsürü lapung chingnü limshude jindükhün khülang ching alokhün yeahshung; jurü ching mihtsürü jing mütsah, arübo mihtsürü kheaknü limshude zhina kihlah.

⁵Alo chingnü tsühyungpü akhiukchoh; tüshe alunglim monü atakkhi ruk lahthünaka lah.

⁶Lungbo ju shotolung-bluk lapung ah tüsho asungthulung ching suna zahlah.

⁷Ju limro shihtsüh wuhnu tümünü mümükheah, tüsho müleangtopü müknü müngü.

⁸Bukmüke mütüm shiwühbonü ju kheak müthrüm; kekhüzünü ju mütsahho.

⁹Apinü api khah molung ching amachoh, tüsho ayingbo bebah awungbo lahthünakchoh.

¹⁰Apinü lungbo ching aru kiuashungchoh, tüsho api müknü shoto kukruk lüpdükhi ngüchoh.

¹¹Ayung kenübo khiungde apinü kiuchoh; jika lakhi kukrukbo apinü ayin ching hande arüchoh.

¹²Tüshe lümlung küchingnü angüba? Tüsho anikhitpü dangpung küching la?

¹³Mihtsürünü ju adün mümükheah, tüsho arhang larü khah ching ju müngü.

¹⁴Asüknü tha, “Ju I kheak müla,” tüsho ketonü tha, “Ju I lung müla.”

¹⁵Ju sunanü muthulokhuk tüsho ju dünde shotoyinchi madünkhitkhuk.

¹⁶Ophir lung, shihshihlung yungsho shotolung-bluknü makekhuk.

¹⁷Suna tüsho meayinlungnü ju makekhuk, yungsho amo-achak suna atsüdaknü mümüthriachihkhuk.

¹⁸Muliuke-lung yungsho thüyinlung dünkheak a mütha; lümlung dün ju sünso lungbo kheaknü achangbe.

¹⁹Ethiopia oliv lungnü makekhuk yungsho suna müthsün kheak makekhuk.

²⁰Dale tüsho lümlung küchingnü arücho? Tüsho anikhitpung küching la?

²¹Ha arhang larü alala mük kinü rama lah, tüsho thüning wuhnubo kheaknü jika lah.

²²Athsümünim tüsho Ashepünü tha, “Isa nükhünnü ju dünkheak kiubuyu khülang sodo.”

²³Thrünpuhnü ha limro anikhitlah tüsho alapung mükheahlah.

²⁴Tümüde apinü alomi achinkheam ching kheahchoh, tüsho thüningbo khüp lüpdükhi ngüchoh.

²⁵Apinü küyimki apung kilim wu jihkhea, tüsho kebo shihcham thsükhea;

²⁶apinü küyimki tsüng thsungkheak yakzan tüsho tsüngmuk limro thsükhea;

²⁷judüki apinü lümlung ngü tüsho ju khipkhit; apinü ju rünkihshih tüsho yimkhit.

²⁸Tüsho apinü mihtsürü ki tha, “Tsükjide, ATUNGPUH wüntrekhi ju lümlung ah; tüsho amütsü-rhimo chingnü achamkhipü ju anikhitkhi ah.”