Read Yimchungru Naga Job 29 Bible Online

Job 29 - Yimchungru Naga bible

Job 29

¹Kheaküshe Jobnü api yu tankih tüsho tha:

²O, ahokhi khinubo ching nangde I lakhülaa, Thrünpuhnü I kheak kheahkhi nimungbo ching nangde;

³küyimki api tsünpungnü I ku kheak tahkihkhea, tüsho api ayinnü amiting hode inü tsah;

⁴küyimki I tsakamde alakhea, küyimki Thrünpuh kheak müyamrü thsükhi I khimyam kumung lakhea;

⁵küyimki Wutobuh I lung lakhea, küyimki I tsührübo I mükamde alakhea;

⁶küyimki I jing düküpungbo niuhkenü müsüh-a lakhea, tüsho lungtonü müdangke bukkhitshih!

⁷Küyimki I kiuto ripit ching wukhiuk, küyimki inü wungdophulung binkhea,

⁸athrününgtsüng mihtsürübonü I ngü tüsho jikabah, tüsho ashinbuhrübonü wusurü tüsho zhip;

⁹yakzanshuhrübonü thiyu müthadebah, tüsho arü khahbonü arü münbo hümabah;

¹⁰mükheahmudurübonü she sheak makhiuk.

¹¹Nükhünnü asochoki I müngühjih, tüsho müknü angüchoki tsülah de lüm;

¹²tümütüsho azhirü zhochihrü tüsho arungrü mülarü mürerü inü bekhit.

¹³Thsümütsürü müngühmühi I kheak arü, tüsho inü khimoberü mulong asühpü thsüde khün thsüshih.

¹⁴Inü thiyuro-lungki yih tüsho junü I phuyujih; thiyuro ju shulünkhim tüsho kuhingbe khülang nangde alakheah.

¹⁵I ju müktukrü kilim mük, tüsho jingkikrü kilim jing lakheah.

¹⁶Müthsümülarü thsungkheak I abuh lakheah, tüsho inü mümükheahrü dünkheak yimkhitjih.

¹⁷Inü mihbukmuyuk shihtsüh-hü lakkhijih, tüsho arünü nguhkih-a lakhi yankhijih.

¹⁸Judüki inü tha, “I a sap chingnü ashebah, I nimungbo loyi nangde ahihshihbah;

¹⁹I yingbo kebo ching chinde yü, I khahdübeakbo kheak tsüngreroro ayinke jih;

²⁰I müretahkhi aso I kheak lakheah, tüsho I khah ching sanglüh aso lang alakheah.”

²¹Arünü I ki ani, tüsho aleang, tüsho I lümthiyan thsungkheak düsheak makhiukde la.

²²Inü asukshu arünü masuklo, tüsho I yu ju arü kheak ayinke nangde atsamkih.

²³Tsüng nangde arünü I thsungkheak aleang; mükheankim tsüng aleangkhi nangde arünü arü münbo ka.

²⁴Inü arü kheah-a münene she arünü ju mükin, tüsho I miro yinkhi arünü mükheamshih.

²⁵Inü arü thsungkheak limro mokhit tüsho arü yo atobuh nangde bin; @POE TRY-3 = I ju thirithsürü bolung kiulongthsüpuh nangde alakheah. I a atüzhorü shukheamrü nangde alakheah.