Read Yimchungru Naga Job 3 Bible Online

Job 3 - Yimchungru Naga bible

Job 3

¹Ha dunglim Jobnü api mün khimshuh tüsho api zübekhi nimung athru:

³I zübekhi nimung tüsho “Athrürü nunu lah” de athakhi dükheakshang.

⁴Ju nimung mitingshang! Thrünpuhnü ju dülümrhih yungsho ayin dütah.

⁵Khüpdode tüsho mitingdakde kamshang; amo shode amitingnü ayin liudoshang.

⁶Ju tsüngre — zhingyi arüde mitingshang! Kam yo nimung bolung dasühachih; khinubo khekhi ching dübeshih.

⁷Am, ju tsüngre yihnüpü mülakhi kamshang; asühachihkhi düsheak düsoshih.

⁸Keto athrurübo, sherünü Leviathan asürüshihkhukchonü athrushang.

⁹Ju yapsu chiningbo mitingshang; ayin thsungkheak mükkin thsüshang, tüshe dülashih; yapsu ayin akhuhbe düngüshih —

¹⁰tümütüsho junü I be nuyam ripit mürih tüsho küpkhuk I mük kinü müram.

¹¹Tümüde zübechoki I müshekhea, I nuyam chingnü akhiukchoki tümüde müdükheakkhea?

¹²Tümüde I leangkhipü mukhukbo lakhea, yungsho I mütrüpü niuhbo lakhea?

¹³Kheakü I akhimahedo yapde alapü thsükheah; I yapshea lapü lakheah; tüsho I sühakhimpü lakheah,

¹⁴alomi kiulongthsürübo tüsho lümthiyanrü bolung, sherünü arü thsungkheak athsümünimkhibo thsülo,

¹⁵yungsho suna larü yakzanshuhrü bolung, sherünü arü yambo shotoyinchinü mishih.

¹⁶Yungsho tümüde shea-zübekhi khungarü nangde, ayin küyimkishe müngükhi khungarü nangde I kiuyuka mübahkhea?

¹⁷Ju ching mihbukmuyuk küpkhuk chingnü tuklochoh, ju ching keakzungrü sühakhimde lah.

¹⁸Ju ching aramrübo rukhühnü zuzu lah; arünü rhimo-putungrü düsheak muso.

¹⁹Anini tüsho ato ju ching lah; tüsho azhorübo arü putungrü kheaknü zuzu lah.

²⁰Tümüde küpkhuk ching larü kilim ayin jihkhea, tüsho me ching khühde larü kilim rhangdung jihkhea,

²¹shepünü ashepü mürheangcho tüshe marü, tüsho ju thsungkheak rama lakhi rahpung kheaknü alü yimcho;

²²sherünü hode asühachihcho, tüsho arünü kiuyuk ngüchoki asühcho?

²³Tümüde limro müngükhukrü kilim ayin jihkhea, shepü Thrünpuh nü ayündoa lakhea?

²⁴Tümüde I mütsühyide I sheak arüchoh, tüsho I ashearakhi ke nangde dungkhitchoh.

²⁵Tsükjide inü trede alakhi I kheak akihdo, tüsho inü trede alakhi I kheak keamkih.

²⁶I zuzu müla, yungsho I mükeamram; I sühakhim müla; tüshe küpkhuk arüchoh.