Read Yimchungru Naga Job 30 Bible Online

Job 30 - Yimchungru Naga bible

Job 30

¹Tüshe kheakü I kheaknü azürübonü, sherü buhrübo namfimihnu aheangrü I yihnubo she mumokhea, arünü I luhmünechoh.

²Arü khah sühmüh chingnü I tümü alü ngüde? Arü sühmüh alala tsoabah.

³Arü zholümkhi tüsho khümzungnü trangkhita sunglo, azhikpung tüsho abahkhi-lo lim yüchoh,

⁴arünü loshelo sangrungbo tüsho dangchi yingbo thokhita tsüh.

⁵Arübo boto chingnü yankhita lah; mihtsürübonü ahührübo nangde arü dunglim zhichoh.

⁶Arübo jindükhün lo jukrüpkhi ching, alo khün ching, tüsho lungtobo ching labah.

⁷Rimkiu bolung arü khungchoh; arübo khingphu khüp khurua lah.

⁸Makharü, mungshi mülakhi tsührübo lomi chingnü rhapkhita tsoshihdo.

⁹Tüsho kheakü arünü khün chingnü I luhmünechoh; I arü ki münedung khülang lah.

¹⁰Arünü I thraneanchoh, arünü I kheaknü chamkhide lah; arünü I miro ching mukhiukkihpü mudukiuhlo.

¹¹Tümütüsho Thrünpuhnü I sanglüh zhi trünjih tüsho I thsünüde kamshih, arünü I miki bukakhiuk.

¹²I khah tsülim peang boto arhunganimde wusuchoh; arünü I jing nima tsoshihchoh, tüsho I thsümünimpü thsüde limro thsakhamchoh.

¹³Arünü I limro yihshakdo, arünü I thsümütsü alü kamshihchoh; shenü arü müyanlo.

¹⁴Akiuashungkhi amülih hode arübo arüchoh; athsümünimbe chinthrüm bolung arübo lungphülapchoh.

¹⁵Atrebebo I kheak akihdo; I wüntrepü apungnü ayünkhi nangde tüsho I lakhit amo nangde tsoabahdo.

¹⁶Tüsho kheakü I rhangdung keamabahchoh; thsünü nimungbonü I tholodo.

¹⁷Azhing ching I robo dukchoh tüsho I nguhde athsükhi küyimkishe mükheam.

¹⁸Rangkhuhnü I khimmih zamphüneanchoh; I hung kümpü nangde junü I thsünchoh.

¹⁹Apinü I akhimniuhniuh ching jipyukdo, tüsho I asungthulung le awah nangde kamdo.

²⁰Inü nü ki zhichoh tüsho nünü I ki malojih; I zhiplah tüsho nünü I kheak akheahkheah kheahchoh.

²¹Nünü I kheak bukmükede kamdo; nü khah wu-sühmühnü I thsümüchichoh.

²²Nünü I apung kheak shuhkih, nünü I ju kheak tsahshih, tüsho nünü I chinthrüm ahukkhi ching thophülap.

²³Nünü I arhang larü alala yüpü akhukhi dangpung limpeang ashe lim bede ayübah de inü mükheahlah.

²⁴Lümthsünü ching apinü arung thsungkheak zhichoki, tsükjide thsümünima lakhi mihtsürü kheak apinü akhah muchungkih.

²⁵Küpkhuk ching labuh thsungkheak inü mütrip yung de? Zhochihrü thsungkheak I menü mütüzho yung de?

²⁶Tüshe küyimki inü atsü thsungkheak kheahkheanü amütsü arü; tüsho inü ayin aleangchoki amiting arü.

²⁷I mulong küpkhuk ching lah tüsho sühakhim müla; thsümütsü nimungbonü I shorudo.

²⁸Inü tüzhode yüchoh, tüshe ani ching yung; inü amukhungrü miki wusubah arung thsungkheak zhichoh.

²⁹I a rimre keoniorü ah, tüsho kewühtopübo müyamrü ah.

³⁰I küp mürakdo kamchoh tüsho I kheaknü keamkhichoh, tüsho I robo phülamnü takchoh.

³¹I bingkhung ju atüzhobe kamdo tüsho I khungpi ju atriprü düsheak kamdo.