Read Yimchungru Naga Job 31 Bible Online

Job 31 - Yimchungru Naga bible

Job 31

¹Inü I mükbo bede tangzüng khülang thsüdo; dale küde thsah inü anünürü kheak kheahkhukpü?

²Akulim Thrünpuh kilimnü I shihcham tümü laba, tüsho achang kheak Wutobuh kilimnü I yamrüplurüp tümü laba?

³Mihbukmuyuk thsungkheak athsümünim, amülim rhimorü thsungkheak thsümütsü yung de?

⁴Apinü I limrobo müngü de, tüsho I jingdükü aban khechoh yung de?

⁵Inü akeangyu ching tsah-a lasho, tüsho mülapmüjipü ching I jing athria lasho —

⁶thiyuro-akearapung ching I adüna kheahang, tüsho I lungkikhi Thrünpuh nü mükheahshang!

⁷I jingdükü limro chingnü anguh-a lasho, tüsho I mulongnü I mük yana lasho, tüsho I khahbo müneana lasho;

⁸dale tüsho inü yanganü, tüshe püpürü tsühshihanü; tüsho I thsungkheak tümü mukhuhchonü rukkhita bahang.

⁹Inü aliberü khülang ki mürüh-a lasho, tüsho I yamhingrü khimdopü ki münitde aleanga lasho;

¹⁰I yamkhünbenü püpürü thsungkheak hi chushang, tüsho athrürü püpürünü anihbe lung yapshang.

¹¹Tümüde ju achihbe, mahkhapbe neak labah.

¹²Ha taka thsümünimshihbe mo khülang ah; I yimlukhi alala aniua lapü lakheah.

¹³Arünü I azhihde atsanglochoki inü I yamlarübo, athrürü tüsho aliberü ki thiyuro reanglosho.

¹⁴Thrünpuh wusuchoki inü tümü thsüba? Apinü akeokhichoki inü api ki tümü aloba?

¹⁵Shepünü I nuyam ching thrünkheanü arü she athrünkhi yung de? Tüsho khülang buhnü isa chido nuyam ching thrünkhi yung de?

¹⁶Inü zhochihrü künkhi tümükhüh tukloa lasho, yungsho khimoberü mükkin thsükhi müjih-a lasho,

¹⁷yungsho I jim I zangrü tsüh-a lasho, yungsho mürerünü ju mütsühshih-a lasho —

¹⁸tümüde I athunuchokinü buhrü nangde inü mürerü mütrükheah, tüsho I be nuyam chingnü inü khimoberü kümkheah.

¹⁹Inü khürü khimmih mülakhinü shede, yungsho zhochihrü mihtsürü khülang aphuyupü mülade ngüa lasho,

²⁰api mulongnü I müshijih-a lasho, tüsho I namfimihnu namnü api mülamlama lasho;

²¹inü zhochihrü azhihde I khah shuhkih-a lasho, ripit kheak I rungrü lakhi ngümonü;

²²dale tüsho I dubuh kheaknü I bin ayokhishang, tüsho amüchin kheaknü I bin zhakshang.

²³Tümütüsho Thrünpuh kilimnü athsümüchibe ju inü trede alakheah, inü küyimkishe müthsükhuk.

²⁴Inü suna kheak mulonglama lasho, yungsho atsüdak suna kheak I mulongram de thaa lasho;

²⁵I lakhit tokhi yungsho I khah mikhi hode inü asüh-a lasho;

²⁶ani tahchoki yungsho khinu tsüde yinde atsahchoki inü kheah-a lasho,

²⁷tüsho I mulongramde tsophülapa lasho, tüsho I münnü I khah müthsüpa lasho,

²⁸ha she mahkhaprübonü amülim jide athsümüchibah, tümüde achangbe Thrünpuh ki amülim thsüdo.

²⁹I thraneanrü thsümünimkhi kheak inü asüh-a lasho, yungsho amütsünü arü yanphuhchoki khide asüh-a lasho —

³⁰arü rhangdung athrude akheangkhinü I münnü neak müyihbeak.

³¹I khimyam ching larünü mütha shi, “Nihbuh shih kheak reangmükeamrü she la le?”

³²hanrü sheshe wungdo ching müyap; inü hantsahrü kilim I khimdopübo khimshuhjih.

³³Adam nangde inü alakmihkhibo rama lasho, I amülimbo I khüh ching rama lasho,

³⁴tümütüsho boto trekhinü inü zhipa lasho, tüsho gukbonü abahyukkhinü I müzüna lasho, junangde inü khimdopü hode muwukhiukde zhikde laa lasho —

³⁵O, khürünü I ki anikhülaa! Ha ching inü adokihkhi lah! Wutobuhnü I ki aloshang! O, I azhihrünü hüm khülang thrüta lakhülaa!

³⁶Tsükjide inü ju I dubuh kheak hanbah; kuthran nangde I kheak thranbah;

³⁷inü I jingdükükhi alala api ki jihbah; yakzanshuhrü khülang nangde inü api shorubah.

³⁸I lonü I azhihde zhia lasho, tüsho chamkubonü rukhühnü tripa lasho;

³⁹ju ching akhiukkhi inü amo müjihde tsüh-a lasho, tüsho atungrü sheshih-a lasho;

⁴⁰wheat hi müthri ayangbo mukhuhshang, tüsho barli hi müthri keakthrüt mukhuhshang. Job yubo arün thsüabah.