Read Yimchungru Naga Job 32 Bible Online

Job 32 - Yimchungru Naga bible

Job 32

¹Jumonü harü mihtsürü mahsamnü Job ki alopü arün thsü, tümütüsho anihbuh zangrü thiyurolungki thsüa lu.

²Judüki Buzrü, Ram guk Barakel tsührü Elihunü bukakhiuk. Apinü Job kheak bukakhiuk tümütüsho Thrünpuh kheaknü alü anihbuh zangrü alim thsüa lu;

³apinü Job müyamrü mahsam kheak she bukakhiuk tümütüsho Job amülim ching lah de arünü thatha she arünü alopü müyimkhit.

⁴Kheakü Elihunü Job ki asukpü aleang, tümütüsho arübo ju api kheaknü azorü lakheah.

⁵Tüshe küyimki harü mihtsürü mahsam mün ching alopü mülakhi Elihunü angükhea, api bukakhiuk.

⁶Buzrü Barakel tsührü Elihunü alo: I a athunu ah, tüsho nüsa azorü ah; jumonü nüsa ki I lümkhi thapü trekheah.

⁷Inü tha, “Shinbeshinbuhbonü asukbeah, tüsho kam hihkhibonü lümlung thsangyubeah.”

⁸Tüshe mihtsürü kheak me khülang lah, tüsho Wutobuh sheaknü anikhitpü api kilim jihchoh.

⁹Azorü thsümonü lümlung larü yung, yungsho ashinbuhrü thsümonü alungki anikhitchoh yung.

¹⁰Jumonü inü thachoh, “I ki aniang; inü she I lümkhi khipkhitanü.”

¹¹Kheahang, nüsanü athapü yimchoki inü nüsa yubo aleangdo, nüsa lümlung yubo thakhi inü anido,

¹²Inü nüsa kilim anguhdo tüshe shenü she Job amülim mükamshih, nüsa bolung shenü she api yubo malojih.

¹³Tütüshe, “Isanü lümlung ngüdo; Thrünpuhnü api yu aloshang, mihtsürünü yung,” de dütha.

¹⁴Jobnü I azhihde api yu mütha, tüsho nüsa yubonü inü api ki malo.

¹⁵Arübo mulong niniabahdo, arünü kheaküa malo; arünü thiyu thapü müla.

¹⁶Arünü masukde ju kheak zhipbah kheaküa malomonü inü aleangbea de?

¹⁷Inü she alobah; inü she I lümkhi khipkhitbah.

¹⁸Tümüde I a thiyubonü milah; I kheak lakhi menü I athsungchoh.

¹⁹I mulong ju asheak tsopung mülakhi yukhu ruk ah; yukhu aso nangde, ha ajukpü thsüchoh.

²⁰Inü asukbeah, junangde I sheak akhimbah; inü I münküp khimshuhbah tüsho alobah.

²¹Inü she jakmükheah yungsho she ki she thsüpkhilukhi müthsü.

²²Tümüde küde thsüpkhilukhibanü inü mümükheah — jude yungsho I Thrünrünü I nahde bea lubah!