Read Yimchungru Naga Job 33 Bible Online

Job 33 - Yimchungru Naga bible

Job 33

¹Tüshe kheakü inü athakhi aniang, O Job, tüsho I yubo alala aniang.

²Kheahang, inü I mün khimshuhchoh; I mün ching mulonü asukchoh.

³I yubonü I mulong lungkikhi khipkhitchoh, tüsho I münküpnü tümü mükheahlanü düshihde asukchoh.

⁴Thrünpuh menü I thrün tüsho Wutobuh sheaknü I rhangdung jihchoh.

⁵Nünü kuksho, I ki aloang; nü yubo I miki akhinashu thsüde zoang; nü zhippung thsakhamang.

⁶Kheahang, Thrünpuh miki nü nangde I lah; I she alo dütrenü akamkheah.

⁷I trekhinü nü müyinnimpü müla; yungsho I khah nü kheak mülangde müla.

⁸Tsükjide, inü sode nünü asukdo tüsho nü yubo alankhi inü sodo.

⁹Nünü tha, “I müsühlah, alakmihkhi müla; I tsangkhitlah, tüsho I kheak amülim müla.

¹⁰Tütüshe Thrünpuhnü I kheak amülim ngüdo; apinü I ariri nangde lümchoh.

¹¹Apinü wuhrünliu ching I jing yukchoh, tüsho I jingdükü alala kheahchoh.”

¹²Tüshe ha ching nü mulungki. Inü nü ki aloanü: Thrünpuh a mihtsürü kheaknü atobe.

¹³Tümüde nünü api azhihde, “Apinü I yubo malojih” de thacho?

¹⁴Thrünpuhnü limro khülang yungsho püpü chingnü asukchoh, mihtsürünü ju manikhit.

¹⁵Azhing ching mihtsürübo yapshea lachoki, Thrünpuhnü milim tüsho michih chingnü asukachihchoh.

¹⁶Apinü arü nükhünbo khimshuhjihchoh tüsho müzünde arübo treshihchoh,

¹⁷junangde apinü arübo arü rhimobo chingnü beakhinbah, tüsho kükheangkhi chingnü arü bemuwuhbah,

¹⁸apinü api me alokhün chingnü müsheshih, arü rhangdungbo nukshangnü adükheakpü chingnü khümkhit.

¹⁹Api ju yapkiu kheak thsünüpünü she thsümüchichoh, tüsho api robo ahihdo ching khide dukshihchoh,

²⁰junangde api rhangdungnü yikhap, tüsho tsühyungpü akebe mükünde kamchoh.

²¹Api shihtsü ajukheamabahbah müngükhuk; tüsho api robo müngüde alakhi thsü, kheaküa trukkhita lah.

²²Api me alokhün phünide tüsho api rhangdung ashe phünide yüchoh.

²³Dale ju ching mihtsürü ki alungki khipkhitpü yunirü khülang limburü, chithürü bolungnü lasho,

²⁴apinü anihbuh ki müthsümde thachoh, “Alokhün ching yüzahpü chingnü api bekhitang; arhokhitpü khülang inü ngüdo;

²⁵api shihtsü athunu nangde aso kamshang; api sühmüh lakhi athunu nimungbo ching rholoshang.”

²⁶Apinü Thrünpuh ki tamkhüntamnübah tüsho apinü api kheak asühbah, apinü api jak asühde akheahbah, tümüde apinü mihtsürü kilim api thiyuro-lungki jihlochoh.

²⁷Apinü mihtsürübo kheahbah thachoh, “Inü neak yihbeak, tüsho alungki lakmih tüsho ju I kilim müjihlo.

²⁸Apinü I me shingkung ching yüzahpü chingnü rhokhit, tüsho I rhangdungnü ayin ngübah.”

²⁹Thrünpuhnü atsütsü harü alala mihtsürübo kheak mahne ki, mahsam ki rhimochoh,

³⁰arü mebo shingkung chingnü belode arüpü, junangde arünü rhangdung ayinatrüm ngübah.

³¹Aniang, Job, I ki aniang; zhikde aleangang, inü asukanü.

³²Nünü tümükhüh thapü lasho I ki aloang; asukang, tümüde inü nü alim kamshihpü mulonglah.

³³Jude yungsho, I ki aniang; zhikde aleangang, tüsho nü ki inü lümlung thsangyubah.