Read Yimchungru Naga Job 34 Bible Online

Job 34 - Yimchungru Naga bible

Job 34

¹Judüki Elihunü mutuklode tha:

²I yubo aniang, nüsa lümlung larü mihtsürübo, tüsho I ki aniang, nüsa amükheahrübo;

³tümüde mulonü tsühyungbe tsühakheahkhi nangde nükhünnü thiyubo rükakiakheahchoh.

⁴Tümü alungkianü isanü mokhitanü; tümü atsüanü isa bolung isanü lümakheahanü.

⁵Tümüde Jobnü thado, “I a amülim müla, tüshe Thrünpuhnü I alim hande tsodo;

⁶I alim dünkheak inü akeangyu thabea de? I amülim mülalashe I mü ju müthsüngukhukbe lah.”

⁷Shepü Job nangde la, shepünü mükhemükimkhi ke nangde yungcho,

⁸shepü amütsü-rhimorü lung ahoricho tüsho mihbukmuyuk lung tsahcho?

⁹Tümüde apinü tha, “Thrünpuh lung asühkhinü tümü alü müla.”

¹⁰Jumonü, I ki aniang, nüsa lüm larübo, Thrünpuhnü mihbukmuyuk rhimobah dükhi ju limshuabahang. Tüsho Wutobuhnü amülim mürhimo.

¹¹Tümüde apinü mihtsürü kuhi api rhimobo yande jihlochoh, tüsho api limrobo yande apinü api thsambah khülang ngüshihchoh.

¹²Tsükjide Thrünpuhnü mihbukmuyuk mürhimo, tüsho Wutobuhnü thiyuro mushuhphülap.

¹³Thrünpuhnü khürü kheaknü api wu ngükhea de? Shenüanü api kheak alomiküp alala kheahpü zojihkhea de?

¹⁴Apinü anihbuh me lulosho, tüsho api sheak lulosho,

¹⁵rhangdung lakhi alala rukhühnü adükheakbah, tüsho mihtsürü alala asungthulung kamlobah.

¹⁶Nü anikhitkhi lasho, ha aniang; inü athakhi aniang.

¹⁷Thiyuro thraneanrünü yakzan shuhba de? Nünü thiyuro-lungki tüsho Wuto bahyukba de?

¹⁸Shepünü kiulongthsürü ki, “Nü mihbukmuyuk!”de thacho?

¹⁹Shepünü yakzanshuhrübo ki jakmükheahcho, zhochihrü kheaknü alü alarü ki wüntre müjihcho, tümüde arü alala api khah rhimo ah.

²⁰Kim khülang ching arü shechoh; tsüngphulung ching mihtsürübo niukchoh tüsho dükheakchoh, mihtsürü khah mübede sühmüh larübo lude tsochoh.

²¹Tümüde api mükbo mihtsürü limrobo kheak lah, tüsho apinü arü jingdükübo alala ngülah.

²²Amütsü-rhimorü jikpü thsüde ju ching amiting yungsho alamme müla.

²³Tümüde Thrünpuh müngüh mahkhap ching yüpü apinü she ki she kim akhua müla.

²⁴Apinü mükeokhide sühmüh larübo adütre kamshihchoh, tüsho arü müthri püpürü zochoh.

²⁵Ha ruk, arü rhimo mükheahbah, apinü arübo azhing ching lahphülapchoh tüsho arübo zünakchoh.

²⁶Apinü arübo arü mihbukmuyuk dünkheak mührünü ngüde shikchoh,

²⁷tümütüsho arünü api kheaknü rholo, tüsho api limrobo tümü she akin müla,

²⁸junangde arünü zhochihrübo tripde api kilim arüshih, tüsho thsümütsürünü azhikhi apinü so.

²⁹Trükshih yungsho bümlangzü thsungkheak thsüthsü, küyimki apinü zhikde alabanü shepünü küpkhuk jihkhukba? Api miro ramchoki shepünü api ngükhukba? —

³⁰junangde Thrünpuh mümükheahrünü kiulong müthsü, jude yungsho mihtsürü phuhbah.

³¹Tümüde khürünü Thrünpuh ki thanah, “Inü thsümüchi arümdo; kheaküa inü amülim müthsülo;

³²inü müngükhukkhi I ki thsangyuang; inü amülim rhimoa lasho, inü ju mürhimolo”?

³³Thrünpuhnü arhimokhi nünü azhihbahle, nünü alunekhi apinü arhimopü mükkin thsüba de? Tümüde nünü mokhitbeah, tüsho inü yung; jumonü nünü tümü mükheahlanü thaang.

³⁴Anikhitkhi mihtsürünü tüsho lümlung larünü I ki anibah I ki thabah:

³⁵“Job nü mükheahmudu mülade asukchoh, api yubo lümlung müla.”

³⁶O, Job ha akeakheahkhülaa, tümütüsho api yu alokhibo ju mihbukmuyuk mihtsürü ruk ah.

³⁷Tümüde apinü anihbuh neak ching azhihpü yukajakchoh; apinü isa bolung akhah damchoh, tüsho Thrünpuh azhihde api yubo alü kamshihchoh.