Read Yimchungru Naga Job 35 Bible Online

Job 35 - Yimchungru Naga bible

Job 35

¹Judüki Elihunü mutuklode tha:

²Ha alim ah de nünü lümla de? Nünü thachoh, “ATUNGPUH miki I alungki ching lah.”

³Nünü keokhichoh, “I tümü alü la? Neak müyihbeakkhi I tümü alü thsüba?”

⁴Inü nü tüsho nü müyamrübo ki alobah.

⁵Thüning lim kheahang; amobo kheahang, küpü nü kheaknü achangbe la.

⁶Nünü neak yihbeaksho, api azhihde nünü arhimokhitkhi tümü la? Tüsho nünü alakmihkhi hihmonü nünü api ki tümü thsüpü?

⁷Nü thiyuro a sho, nünü api ki tümü jihpü; yungsho apinü tümü nü khah chingnü leangkhicho?

⁸Nü mihbukmuyukkhinü nü nangde püpürü rheakchoh, tüsho nünü atsü rhimokhinü api rungchoh.

⁹Tümütüsho junokhi hihkhi hode mihtsürübonü zhichoh; khürünü arü khümkhitshihpü thsungkheak jichoh.

¹⁰Tüshe shenü mütha, “I Thrünrü Thrünpuh küching la, shepünü azhing ching mulonglam jihcho,

¹¹shepünü alomi shiwühbo kheaknü alü isa ki thsangyucho, tüsho thüning wuhnubo kheaknü alü isa lümlung lashihcho?”

¹²Ju ching arünü zhichoh, tüshe amütsü-rhimorü kükheangkhinü apinü malojih.

¹³Tsükjide Thrünpuhnü akeangkeang zhikhi manichoh, yungsho Wutobuhnü ju mükheahjih.

¹⁴Nünü api müngü de thatha she thiyuro api miki lah, tüsho nü a api aleangbeah!

¹⁵Tüsho kheakü, api bukakhiukkhinü müthsümüchi, yungsho mülimkhi ching amümürang thsüchoh,

¹⁶jumonü Job nü akeangkeang thakhi ching amün khimshuhchoh; apinü mükheahmudu mülade thiyubo alü kamshihchoh.