Read Yimchungru Naga Job 36 Bible Online

Job 36 - Yimchungru Naga bible

Job 36

¹Elihunü mutuklode tha:

²I lung anikhüh arümang, tüsho nü ki inü ahuhbah, tümütüsho Thrünpuh thsung thsüde inü tümükhüh thapü lah.

³Inü I mükheahmudu limshu chingnü hande arübah, tüsho I Thrünrü thiyuro de ahuhbah.

⁴Tümüde tsükjide I yubo amülim yung; shepü mükheahmudu ching khiukdahlanü nü lung lah.

⁵Tsükjide Thrünpuh a Wuto tüsho she amülim müjih; api anikhitkhi sühmüh ching Wuto lah,

⁶apinü mihbukmuyuk rhangdung mülashih, tüsho thsünürü kilim arü alim jihchoh.

⁷Apinü thiyuro kheaknü api mükji muluakhin, tüshe kiulongthsürü lung kiulongthsü-binkiu kheak apinü arü lünnü binshihchoh tüsho arü shuhkih-a lah.

⁸Tüsho arübo wuhrünliu ching rhükdoa lasho tüsho thsünü-liu ching tholoa lasho,

⁹judüki apinü arü ki arü rhimo tüsho arünü alakmihkhibo, arünü bukakhiukde yakli huhchoh de athabah.

¹⁰Apinü thsangdankhi lim arü nükhünbo khimshuhchoh, tüsho arü amülim chingnü rholopü thiyukhüm jihchoh.

¹¹Arünü anisho, tüsho api tankihsho, arünü arü nimungbo lalim tsüde tüsho arü kambo reangkeamde hoshihbah.

¹²Tüshe arünü manisho, arübo nukshangnü adükheakbah, tüsho mükheahmudu mülade ashebah.

¹³Thrünpuh mümükheahrünü mulong ching bukakhiukkhi zomukhungchoh; apinü arü rhükchoki arünü arung thsungkheak müzhi.

¹⁴Arübo athununü shechoh, tüsho arü rhangdung achihbe chingnü kheamchoh.

¹⁵Apinü thsünürübo arü thsünü hode bekhitchoh, tüsho lümthsünü hode arü nükhün khimshuhchoh.

¹⁶Apinü nü lümthsünü chingnü she zuzu dangpung ching bekhit, tüsho nü dükhüm kheak zojihkhi ju amüdangnü mide alakheah.

¹⁷Tüshe nü a mihbukmuyukkhinü thsümüchi, mahkhapkhi tüsho thiyuronü nü tholo.

¹⁸Bukakhiukkhi hode nü mübephülappü kümkangang; buknim ato khülangnü nü dübephülapshih.

¹⁹Nü lakhitbo, yungsho wuto sühmühbonü nü lümthsünü chingnü khümkhitba de?

²⁰Mihtsürübo arü yam chingnü yana bahpü thsüde azhing dümürheang.

²¹Amütsü lim murholopü kümkangang; tümütüsho ju dünkheaknü nü thsünükheah.

²²Kheahang, Thrünpuh a api wu ching shuhkih-a lah; api nangde thsangyurü she la?

²³Shepünü api limro thsungkheak thanakkhea, yungsho shenü thakhukla, “Nünü amülim rhimodo”?

²⁴Api rhimo shijihpü lümkhitang, küpü dünkheak mihtsürünü khün thsü.

²⁵Mihtsürü alalanü ju ngüdo; mihbüm abannü ju limshu chingnü kheahchoh.

²⁶Tsükjide Thrünpuh ju ato ah tüsho isanü api mümükheah; api kambo khekhi müyimkhuk.

²⁷Thrünpuh nü alo chingnü ke luchoh; tüsho tsüngke atsamkhikhi kamshihchoh;

²⁸amobonü bukkhishihchoh tüsho mihtsürübo kheak suhdahde atsamkihchoh.

²⁹Khürünü amo shomüzütkhi, api lapung chingnü tsüngmukkhi mükheahkhukba de?

³⁰Kheahang, api chinchobenü anihbuh mükamdochoh tüsho keto asükbo mükamdochoh.

³¹Tümüde harünü apinü mihtsürübo mahkhapchoh; apinü tsühyungpü suhdahde jihchoh.

³²Api khahnü tsüngyuk tholochoh, tüsho alakareak kihshihpü thiyukhüm jihchoh.

³³Tsüngmuknü chinthrüm arükhi huhchoh, tüsho shiwühnü she ju arükhi mükheahchoh.