Read Yimchungru Naga Job 38 Bible Online

Job 38 - Yimchungru Naga bible

Job 38

¹Judüki ATUNGPUHNÜ chinthrüm chingnü Job ki alo:

²Mükheahmudu mülakhi yubonü I lümlung mitingabahshihkhi ju shepü a le?

³Mihtsürü nangde nü chim rüma lung, inü nü ki keokhibah, tüsho nünü I ki alobah.

⁴Inü alomi khimtanchoki nü küching lakhea? Nü anikhitkhi lasho I ki thaang.

⁵Shepünü akeara akhualocho — tsükjide nünü mükheahlah! Yungsho shenü ju kheak liu züngcho?

⁶Khimtanbo ju tümü kheak dubola, yungsho amühit-lung shepünü akhimkhea,

⁷küyimki yapsu chiningbonü rukhüh khün thsücho, tüsho Thrünpuh tsührübo alalanü asühachihde zhicho?

⁸Yungsho alomi nuyam chingnü jukphukde akhiukchoki shepünü keto khimdopü rihkhea?

⁹Küyimki inü ju phudopü amo thsükhea, tüsho amiting akheah ching hingdokhea,

¹⁰küyimki inü ju akhüshak thsükhea, tüsho akhrihbe tüsho khimdopübo yihkihkhea;

¹¹tüsho tha, “Ha akhrihbe khiungde nü arübah, ha muho, tüsho ha ching nü bukakhiukde ke-abükkhi tuklobah”?

¹²Nü nimungbo tankihbah arüchoki nünü yapsu ki thiyukhüm jih-a kheahdü de, tüsho ayinkhipü ki nihbuh dangpung mükheahshihdü de,

¹³junangde alomi amünkheam kheaknü tholobah, tüsho mihbukmuyuk ju chingnü mokhita bahbah?

¹⁴Ju ahüpdokhi alo nangde lah, tüsho khimmih nangde aphü müthrichoh.

¹⁵Ayin ju mihbukmuyuk kheaknü thololah, tüsho arü bin shuhkihkhi zhaka lah.

¹⁶Nünü keto kenü ching yüzah-a kheahdü de, yungsho asükbo yimakheahde tsahdü de?

¹⁷Ashe ripitbonü nü ki huhdü de, yungsho amiting kheak ripitbo nünü ngüdü de?

¹⁸Alomi tokhi ha nünü mükheahkhitdo de? Nünü ha alala mükheahsho I ki thaang.

¹⁹Ayin lapung limro küching a, tüsho amiting lapung küching a,

²⁰junangde nünü arübo lapung ching bede ayübah, tüsho thüyam limro phükhitbah?

²¹Tsükjide nünü mükheahlah, tümüde nü zübea lah, tüsho nü kam ashang lado!

²²Nünü phürüm zopung ching yüzahdü de, yungsho aru zopung ngüdü de,

²³küpü inü thsünü kim, keochih tüsho thirithsü nimung thsungkheak zomuwuhla?

²⁴Ayin chamnakkhi dangpung limro ju tümü a, yungsho alomi kheak aniakhiuklim pung küchingnü yünmüzütcho?

²⁵Tsüng ru tüsho tsüngmuk limro shepünü akiukhea,

²⁶she mülakhi lo kheak tsüng arüshihpü loshelo kheak, küpü ching mihtsürü she müla,

²⁷abahkhi tüsho zhikrangkhün lo reangkeamshihpü, tüsho alonü sangrung mukhuhshihpü?

²⁸Tsüng ha abuh la de, yungsho ayinke ha shepü kheak yo a?

²⁹She nuyam chingnü thüwün arükhea, tüsho thüning yo athsak ha shenü azübekhea?

³⁰Kebo lung nangde müküpde kamdo, tüsho asük mi kheak aro kama lah.

³¹Nünü chirhangshuhrü liubo chingkhukba de, yungsho yamungshuhrü liubo trünkhukba de?

³²Nünü chiningkhunung akheahmünchi ching bekhukba de, yungsho nünü kuto ju anunubo bede akitkhukba de?

³³Nünü yinmi yuzüngbo mükheahla de? Nünü arü yuzüng alomi kheak shuhkhukba de?

³⁴Nünü nü düsheak amobo ching shuhkihkhukba de, junangde kekingnü nü zündoshihba shi?

³⁵Nünü chinchobe yüshihkhukba de, junangde arünü ayübah tüsho nü ki thabah, “Isa ha ching lah”?

³⁶Shepünü alunglim lümlung yukjihkhea, yungsho lüm ching anikhitkhi jihkhea?

³⁷Amobo khepü shepü lümlung la? Yungsho shepünü thüning kesopung lahkoyukhukba,

³⁸küyimki asungthulung khunungcho, tüsho alo duduhbo nungkihachihcho?

³⁹Nünü kekhüzü thsungkheak shih jimpü kukla de, yungsho kekhüzü nunu khümkhi reangkeamshihba de,

⁴⁰küyimki arü yappung ching sudübümcho, yungsho arü yam ching aleangpü zuh-a yapcho?

⁴¹Anununü Thrünpuh ki zhichoki, tüsho jim yimde atsahchoki khüyak kilim shenü shih kipcho?