Read Yimchungru Naga Job 39 Bible Online

Job 39 - Yimchungru Naga bible

Job 39

¹Müzüng mihnubonü küyimki anuchonü nünü mükheahla shi? Shihmüchinü anuchoki nünü kheahchonah?

²Arünü khinu külokhüh hanchonü nünü khekhuknahnü, tüsho arünü anukhi kim nünü mükheahla de,

³anunu adrepü khikdübümchoki tüsho anunu adrekhi?

⁴Arü nunubo düküngde kamchoh, arübo mükeak chingnü zokihchoh; arü yüchoh, tüsho alode marüchoh.

⁵Shepünü mütüm donki zuzu thsüde dükhekhea? Shepünü arü rhükkhi trünjihkhea,

⁶küpü kilim inü thüyam thsüshihpü loshelo, arü lapung thsüpü thimi lo jihkhea?

⁷Tümüde apinü kiuto ching alanajikhi thraneanchoh tüsho apinü aberü düsheak muso.

⁸Yimtsühpung thsungkheak awungbo lah, tüsho sangrung-phüyak aban yimchoh.

⁹Ningkepungnü nü tankihpü mulongla de? Apinü are nü moshi yam ching yapba de?

¹⁰Nünü ju wukdarünü nü lu wochakshihba de? Yungsho nü dunglim apinü thulu wochakshihba de?

¹¹Api sühmüh tomonü nünü ju kheak düthsün angüba de, tüsho nü rhimo api ki zojihba de?

¹²Nü hi ju rhimopung ching hande arübah de kinla de?

¹³Kewühtopünü aghidükeang tode atanchoh, tüshe kewuhnu ghidükeang le amoghidung makekhuk.

¹⁴Tümüde ake ju alo kheak bahchoh tüsho alo kheaknü lamlamshihchoh,

¹⁵jingnü arü junakpü, tüsho mütüm shiwühnü jurü thrümphukpü mülümkhit.

¹⁶Nihbe yo yung nangde ajipjip kheak küpküpde bechoh; thsünükhi ju akeangkeang kampü lalashe judü lang mütre;

¹⁷tümütüsho Thrünpuh nü mihzümihdo lümlung thrünjih, tüsho anikhitkhi ching shihcham müjih.

¹⁸Tütüshe küyimki alihpü aghidükeang chutreakbanü, anihbenü khora tüsho aberü ki münejihchoh.

¹⁹Nünü khora kilim sühmüh jihcho de? Nünü ahung kheak athrimnam phukihkhea de?

²⁰Nünü tangkho nangde api jukkihshihcho de? Api sheak amütkhi atrebe ah.

²¹Asühlimnü jindükhün juthünakde dübiuochoh, api thirithsü lim yüchoh.

²²Apinü atrepü mümükheah, mulong münini; nukshang chingnü murholo.

²³Ju kheak hühzopung traktrakchoh, thsüh tüsho thsühshangpü rakrakchoh.

²⁴Abukakhiukde alo juthünakchoh; hulipungpung mütchoki zhikde müzhipkhuk.

²⁵Küyimki hulipungpung mütbanü, apinü sheak amütchoh, “Aha!” Keochihkhi, wühkenorübonü alankhi tüsho azhikhi limshu chingnü münimchoh.

²⁶Nü lümlung hode arilupünü phincho de, tüsho düjinglim aghi chutreakcho de?

²⁷Nü yukhüm hode müleangnü phinde yükihcho de, tüsho achang kheak asap shucho de?

²⁸Apinü lungrhün ching ayam thsübah lachoh, tüsho lunghü ju api chipi ah.

²⁹Ju chingnü shih zütakheahchoh; amükjinü limshu chingnü ngüchoh.

³⁰Ajipjipbonü thiyih duka yungchoh; tüsho ashemi lapung, api ju ching lah.