Read Yimchungru Naga Job 4 Bible Online

Job 4 - Yimchungru Naga bible

Job 4

¹Judüki Temarü Eliphaznü alo:

²Khürünü nü ki thiyu thasho, nüa keaka lapü? Tüshe shenü thiyu müthapü?

³Kheahang, nünü ahihdo thsangdando; nünü khah keakearü düküngshihdo,

⁴Nü yubonü jingmükhea larü duhlo, tüsho nünü sühmüh mülarü mukhuk düküngshih.

⁵Tüshe kheakü ha nü kilim arüdo tüsho nü küpkhukchoh; hanü nü qiuchoh, tüsho nü mulong ninishihchoh.

⁶Nünü Thrünpuh wüntrekhi ju nü mulongram, tüsho nü thiyuro limrobo ju nü mulonglam yung de?

⁷Kheakü lümang, lünnü amülim mülarü shepü dükheak de? Yungsho lungkide alarü sherü dükheakshih de?

⁸Inü ngüdo, shepünü amütsü phüncho tüsho küpkhuk yangchonü ju ruk yimluchoh.

⁹Thrünpuh sheak hode arü dükheakchoh, tüsho api bukakhiukkhi hode arü muyuabah.

¹⁰Kekhüzü arungkhi, kekhüzü bukmüke düsheak, tüsho kekhüzübo shihthrülü hü zhakabah.

¹¹Shih mülakhinü sühmüh lakhi kekhüzü dükheakchoh, tüsho kekhüzü dreto nunubo hiumüzüta lah.

¹²Kheakü thiyu khülang ramde I kilim arü, tüsho ju düsheak I nükhünnü so.

¹³Azhing ching milim mide mihtsürü yapshechoki,

¹⁴atrebe tüsho ajanbe I kheak arü, junü I ro alala niukshih.

¹⁵Menü mükhihde I miro qiu; I pang nam zhip.

¹⁶Ju zhipde alakheah, tüshe inü aphü mükheahkhit, I mük ki tümükhüh nangde alakheah; zhikrangkhündo alakheah, jushu inü düsheak khülang so:

¹⁷“Mihtsürünü Thrünpuh kheaknü alü thiyuro lakhukba de? Mihtsürünü api Thrünrü kheaknü alü tsangkhitkhukba de?

¹⁸Api yamlarübo kheak she apinü akin müla, tüsho api yunirübo kheak apinü amülim jihde thachoh;

¹⁹alo yam ching larü küdükhüh she alaba, shepü khimtan asungthulung ching la, sherübo ari nangde zünakcho.

²⁰Yapsunü are khiungde arü thsümünimchoh; shenü mümükheahde lün thsungkheak arü dükheakchoh.

²¹Arü bolungnü khimyam liu thokhitdo tüsho lümlung mülade arü shechoh.”