Read Yimchungru Naga Job 40 Bible Online

Job 40 - Yimchungru Naga bible

Job 40

¹Tüsho ATUNGPUHNÜ Job ki tha:

²Wutobuh azhihrünü api thsülangbea de? Shepünü Thrünpuh ki atsangachihchonü apinü aloshang!

³Judüki Jobnü ATUNGPUH ki alo:

⁴Kheahang, I müthülün; inü nü ki tümü aloba? I khahnü I mün kheak hümlah.

⁵Inü khülang ki asukdo, tüsho inü malo; mahne ki, tüshe kheaküa müthalo.

⁶Judüki ATUNGPUHNÜ chinthrüm chingnü Job ki alo:

⁷Mihtsürü nangde nü chim rümang; inü nü ki keokhibah tüsho nünü I ki alobah.

⁸Nünü I she amülim kamshihba de? Nü thiyuro thsüpü thsungkheak I bahyukba de?

⁹Thrünpuh nangde nü bin la de, tüsho api nangde düsheaknü nünü tsüngmukpü kukla de?

¹⁰Jude a sho wüntre-müretah tüsho akinashunü nü züt thsang; müretah tüsho atsüdak phuyuang.

¹¹Nü bukakhiukkhi dungkhita bahang, tüsho kükheangküyangrü alala kheak kheahang, tüsho arü azhihayihde kamshang.

¹²Am, arü kheak kheahang tüsho arü thokheamjang; mihbukmuyukbo arü zhippung chingnü züthünakang.

¹³Arü alala rukhühnü asungthulung ching rama zoang; alomi khüp arü miro rüka zoang.

¹⁴Judüki inü nü shibah, junangde nü khah tsülimnü nü khümkhitkhukbah.

¹⁵Behemoth kheak kheahang, küpü nü thrünkhi nangde inü thrün; junü moshipung nangde rim tsühchoh.

¹⁶Asühmüh ju ashahmo ching lah, tüsho awu ju abuk yinbo ching lah.

¹⁷Amo ju cedar sang nangde hitchoh; apho sühbo keakrua lah.

¹⁸Arobo ju müwayinchi hühpung nangde lah, ajingbo ju yinchi dungbo nangde lah.

¹⁹Ha Thrünpuhnü arhimokhi atobe bolung akhuhbe lah — api thrünrünü lang anukshang ki api hande arükhuklah.

²⁰Awungbonü api kilim tsühyungbe akhiukshihchoh, tüsho mütüm shiwüh alala ju ching ahorichoh.

²¹Kemi-sangbün khüp api yapchoh, kepheang ching khiuk bolung jiklah.

²²Kemi-sangbünbo menü alamdolah; keyean sangbonü mükamdolah.

²³Ayung ching düchi yüyü she apinü mütre; Jordannü amün ki bukde yüyü she ju kümkhitde lah.

²⁴Khürünü amük yihdobah aramkhukba de, yungsho azheangnü phuhbah anupung phitjihkhukba de?