Read Yimchungru Naga Job 41 Bible Online

Job 41 - Yimchungru Naga bible

Job 41

¹Nünü Leviathan shiwüh khoyangnü awuhkhitkhukba de, yungsho liunü amulo rhükkheamkhukba de?

²Nünü anupung ching liu yukkhukba de, yungsho khoyangnü amükhühnuk chinkhitshihba de?

³Apinü nü ki ahihdoki mushuba de? Nü ki thiyu thünakde athaba de?

⁴Apinü nü ki lünnü nü yamlarü thsüshihpü tangzüng khülang thsüba de?

⁵Nünü wuhnu ki nangde api ki ahoriba de, yungsho nü yamlaberübo khilim wukliu ching yukba de?

⁶Shothsümolorünü ju kheak alü thsüba de? Arünü ju yinzüyindo bolung chama luba de?

⁷Nünü aküp ju yinchidungbonü amiba de, yungsho thüngüh kheanbe-thsühnü aku chinkhitba de?

⁸Nünü api kheak khah nimkihsho keochihkhi thsü nünü alümkhitbah, tüsho ju küyimkishe mürhimolo!

⁹Ju kukpü mulonglamkhi ju akeangkeang; ju mük ki thrünpuhbo she zhidoabahkhi yung de?

¹⁰Api müneahmusupü thsüde sheshe khide bukakhiukkhi müla. Shepünü I miki zhipkhukpü?

¹¹Shepünü api yankhitkhukba tüsho khümkhitba? Alomiküp ching shenü she ju müthsükhuk.

¹²Ju jingbo yungsho sühmüh tüsho ato dünkheak inü thaanü.

¹³Shenü aküp aleangbe lükhikhukba? Shenü aküp phune chido chinkhitkhukba?

¹⁴Shenü amünjak khimshuhkhukba? Mükamde ahü atrebe kihlah.

¹⁵Adüthsün ju tsungbonü thürünga lah, düküngde rhükrulah.

¹⁶Khülangnü khülang kheak phünide lüpkihlah, junangde adükeak ching apung müyüzah.

¹⁷Arü khülangnü khülang kheak chingkihlah; arü khülangnü khülang kheak müchekihlah tüsho mazükhuk.

¹⁸Api hahchi thsükhinü ayin phürapkhitchoh, tüsho amükji ju yapsu anijing ruk ah.

¹⁹Amün chingnü mo trukhitchoh; modübinbo phinkihchoh.

²⁰Phüh dükihkhi tüsho keakthrüt takkhi chingnü akhiukkhi nangde anupung chingnü mokhüh akhiukchoh.

²¹Asheaknü mokhih takkihchoh, tüsho amün chingnü motru akhiukchoh.

²²Api hung ching sühmüh lah tüsho api miki atrebe lah.

²³Ashih dukiukkhibo ju düküngde wuhrulah tüsho maphap.

²⁴Amulong ju lung nangde müküplah, abobe hi-zübe lung nangde müküplah.

²⁵Küyimki api asürübanü wutobonü she trechoh; arü atrekhinü tümü müthsükhuk.

²⁶Nukshang yungsho thsüh, yungsho yinbean yungsho thsühshangpünü qiuqiu she tümü makü.

²⁷Hanü yinchi ju müneang tüsho müwayinchi ju ashuhkhi sang khejihchoh.

²⁸Hühzonü ju alihde mutsoshihkhuk; alakbe-lungbo ju hitsüt kamabahchoh.

²⁹Shinukbo ju müneang khejihchoh; thsüh jipkhi ju apinü münejihchoh.

³⁰Abuk khüp ju phühmünkheambo nangde lah, thuwuh nangde akhimniuhniuh lo thsukkihchoh.

³¹Hanü phüh nangde khide amapshihchoh; hanü keto ju mujumürabe phüh nangde kamshihchoh.

³²Apinü adunglim azhingzhing limro akhiukshihchoh; tüsho keto ju arhukrhuk amüye kamshihchoh.

³³Alomi kheak api thülünkhi müla, trechihtrean mülakhi shiwüh khülang.

³⁴Apinü lülüshishi shiwüh lüpdükhi khenochoh; api ju kükheangküyang alala kurungkheak kiulongthsüpuh ah.