Read Yimchungru Naga Job 42 Bible Online

Job 42 - Yimchungru Naga bible

Job 42

¹Judüki Jobnü ATUNGPUH ki alo:

²Nünü alala thsükhuklah de inü mükheahlah, nü lümkhi tümünü she müzhipdokhuk.

³Nünü keokhi, “I mükheahmudu mübede lümthiyan shepünü ramcho?” Jumonü tümü inü manikhitkhuknü inü thado, I thsungkheaknü khide amüyinsahbe, küpü inü mümükheahkhea.

⁴“Aniang, tüsho inü asukanü; inü nü ki keokhibah tüsho nünü I ki alobah.”

⁵I nükhünnü nü dünkheak sodo tüshe kheakü I müknü nü ngüchoh.

⁶Jumonü inü I mükhemükimchoh tüsho asungthulung le awahbo chingnü mulong müthrichoh.

⁷ATUNGPUHNÜ harü yubo Job ki asukshu, ATUNGPUHNÜ Temarü Eliphaz ki tha: “I bukakhiukkhi nü tüsho nü müyamrü mahne kheak lah; tümütüsho I yamlarü Job nangde nüsanü I dünkheak alungki masuk.

⁸Kheakü jumonü moshi 7 tüsho namfimihnupung 7 luang, tüsho I yamlarü Job kilim yüang, tüsho nüsa thsungkheak taka kingaünkhi jihang; tüsho I yamlarü Jobnü nüsa thsungkheak tamkhüntamnüjihbah, tümüde nüsanü amülim rhimokhi yande mürhimopü thsüde inü api tamkhüntamnü leangkhibah; tümütüsho I yamlarü Jobnü arhimokhi nangde nüsanü I dünkheak alungki masuk.”

⁹Jumonü Temarü Eliphaz, Shuhairü Bildad tüsho Naamarü Zopharnü yü tüsho ATUNGPUHNÜ arü ki thakhi rhimo; tüsho ATUNGPUHNÜ Job tamkhüntamnü leangkhijih.

¹⁰Tüsho Jobnü api müyamrübo thsungkheak tamkhüntamnüchoki ATUNGPUHNÜ Job müngühmühi jihlo; tüsho ATUNGPUHNÜ Job kilim püpüki lakhi mahne dün jih.

¹¹Judüki api khiungmungrü tüsho chiniurübo tüsho püpüki api mükheahachihrü alala api kilim arü, tüsho arünü anihbuh yam ching api lung yikhap tsüh; ATUNGPUHNÜ api kheak thsümütsü alala hande arükhi thsungkheak arünü api kheak are dükhi huh tüsho mulong shukheam; tüsho arü abannü api kilim sho tüsho suna yingkhüm jih.

¹²ATUNGPUHNÜ Job ahokhi nimungbo kheaknü alü thsüde ashube nimungbo müngühjih; tüsho api namfimihnu 14,000, kemel 6000, moshipung dudu 1000, tüsho donki 1000.

¹³Kheaküshe api tsührü athrürü 7 tüsho aliberü 3 lakheah.

¹⁴Apinü adüjibe Jemima de ji, mahnepü Kezia, asampü Kerenhappuk.

¹⁵Lomi alala ching Job tsührübebo nangde jak atsü aliberü she mülakheah; tüsho arü abuhnü arü khiungmungrü bolung yamrüplurüp jih.

¹⁶Ju dunglim Job kam 140 lakheah, tüsho api tsührübo le atsührü tsührübo lün phüyi khiungde ngülode la.

¹⁷Tüsho Job ashinbuhrü tüsho nimungbo khiungbah sheabah.