Read Yimchungru Naga Job 5 Bible Online

Job 5 - Yimchungru Naga bible

Job 5

¹Kheakü jiang; nü ki alopü thsüde khürü la shi? Shepü amüsührü kilim nü rholoba?

²Tsükjide mulong zhipzhipkhinü makharü laksahchoh, tüsho mükthsükhinü lümthülihrü laksahchoh.

³Inü makharübo kuramde ngü, tüshe zukleangnü inü arü lapung athru.

⁴Arü tsührübo akhümkhitpü chingnü limshude lah, arübo ripit ching zükih-a lah, tüsho arü bekhitpü she müla.

⁵Akhümrünü arü hi tsühbah, tüsho arünü ayangrung chingnü she yihkhitchoh; tüsho kethürirünü arü lakhit mükthsüchoh.

⁶Tümüde thsümütsü alo chingnü makhiuk, yungsho küpkhuk alo chingnü mumukhuh;

⁷tüshe mihtsürübo modübin achanglim phinde yükihkhi nangde küpkhukpü zübea lah.

⁸I thsungkheak a, inü Thrünpuh yimbah, tüsho Thrünpuh kilim I lümkhi jihabahbah.

⁹Apinü ato kukrukbo tüsho müyimkhukbe, mihmüyinsahbe kukrukbo mükhebinbe thsüchoh.

¹⁰Apinü alo kheak tsüng arüshihchoh tüsho thulubo ching kebo yüshihchoh;

¹¹apinü abobe ching larü achang kheak zochoh, tüsho atüzhorü akhümkhitpü shuhmusuchoh.

¹²Rükakirü lümkhi apinü kimchihshihchoh, junangde arü khahnü tümü akuk müngü.

¹³Apinü lümlung larü arü rük mütsü ching phuhshihchoh; tüsho rük mütsürü lümkhibo nahde kheamshihchoh.

¹⁴Arünü animuro kim ching amiting shoruchoh, tüsho animuro ching azhing ching nangde ajamchoh.

¹⁵Tüshe apinü zhochihrü ju nukshang mün chingnü, wuto khah chingnü khümkhitchoh.

¹⁶Jumonü zhochihrü mulonglam lah tüsho jakkheahkhi mün rihdochoh.

¹⁷Thrünpuhnü thsülangjihrü küdükhüh asühpü; jumonü Wuto yakli mükhemükim düthsü.

¹⁸Tümüde apinü yurijihchoh, tüshe apinü rümjihchoh; apinü shikchoh, tüshe api khahnü thsünguchoh.

¹⁹Apinü thsümütsü thuruk chingnü nü bekhitbah; thsümütsü thüne ching tümünü nü muqiu.

²⁰Ashepü khümzung chingnü tüsho thirithsü nukshang wu chingnü apinü nü rhokhitbah.

²¹Nü mulodübeakrü kheaknü ajikshihbah, tüsho athsümünim arüchoki mütre.

²²Athsümünim tüsho khümzung lachoki nü amünebah, tüsho nünü alomi mütüm shiwüh mütre.

²³Tümüde thulu ching lungbo kheak nünü tangzüng labah, tüsho mütüm shiwühbonü nü kheak mungtsü labah.

²⁴Nü yo khimyam khümkhitdo de nünü amükheahbah, nünü nü yo lakhit-kukruk rhuakheahbah tüsho dükheaka müngü.

²⁵Nü tsühsoniusobo hihde alabah de nünü amükheahbah, tüsho nü tsührübo alo rimkiu nangde alabah.

²⁶Nü ashinbuhrü kambah nü kiuyuk ching akheahmünchi ching hiphung rhimopung ching yukkhi nangde arübah.

²⁷Kheahang, isanü ha yimdo; ha thiyuro. Aniang, tüsho nü thsungkheaknü ha mükheahang. Job.