Read Yimchungru Naga Job 6 Bible Online

Job 6 - Yimchungru Naga bible

Job 6

¹Judüki Jobnü alo:

²O I küpkhukkhi adüna kheahkhülaa tüsho I thsümütsü alala shuhrih-a kheahkhülaa!

³Tümüde ju keto loyi kheaknü amülangbe labah; jumonü I yubo dünmüchihkheah.

⁴Tümüde Wuto hühzobo I kheak lah; I menü arü müzüm yungchoh; Thrünpuh yo atrebe I azhihde khin thsülah.

⁵Donkinü rim müjakchoki khungcho de, yungsho moshipungnü ajim tsühchoki mükhümyukcho de?

⁶Amükebe ju thimi mübede tsühkhukla de, yungsho thunuke amüye ching akebe tümükhüh la shi?

⁷Jurü qiupü I mün müke; jurübo I thsungkheaknü amukhiukbe tsühyungbe nangde lah.

⁸O inü mushukhülaa, tüsho Thrünpuhnü I künkhi alojihkhülaa;

⁹Thrünpuhnü asühde I zünakkhülaa, api khah atreakbah I lipkhia bahkhülaa!

¹⁰Haju I shukheambe labah; marümkhukbe thsünükhi ching she inü asühbah; tümüde Amüsühbuh yubo inü müreanglo.

¹¹Inü aleangpü thsüde, I sühmüh tümü a? Tüsho inü arümkheampü thsüde I akheam tümü a?

¹²I sühmüh ju lung sühmüh a de, yungsho I shih ju müwayinchi a de?

¹³I khümkhitpü I kheak sühmüh müla, tüsho arung-limro I kheaknü tsodo.

¹⁴Shepünü müyamrü khülang kheaknü mihmuzho lulochonü Wuto trepü bahyukchoh.

¹⁵I müyamrübonü yungzünunu nangde I mülapyukchoh, yungzübo ngahabahkhi nangde,

¹⁶aru bebah mürakdo abukkhi, aru niude düchi arükhi.

¹⁷Alam kim ching jurü kheamabahchoh; atakchoki arü bukpung chingnü dükheakabahchoh.

¹⁸Hantsahrü arü ru chingnü anguhchoh; arübo akeangkeang lo ching wutuchoh tüsho dükheakchoh.

¹⁹Tema hantsahrünü kheahchoh, Sheba hantsahrünü mulonglamchoh.

²⁰Arübo lakshi thsüdo tümütüsho arünü mulong tode alakheah; arübo ju ching arü tüsho yingyingabah.

²¹Nüsa I miki ju ruk kamdo; nüsanü I thsümütsü ngüchoh, tüsho trede lah.

²²Inü, “I kilim thsambah jihang” yungsho, “Nüsa lakhit chingnü I thsungkheak buknim jihang” de thadü de?

²³Yungsho, “Thiriri khah chingnü I khümkhitang”? Yungsho, “Ajunorü khah chingnü I rhokhitang”?

²⁴I thsangyuang, tüsho inü zhikde akambah; künangde inü lakmih-a lanü I ki anikhitshang.

²⁵Thiyuro yubo küdükhüh müküpla! Tüshe nüsanü atsangachihkhi künangde mütsancho?

²⁶Inü athakhi nünü athsülangpü, tüsho mulonglam mülakhi mihtsürü yubo apung nangde alümba de?

²⁷Nüsanü mürerü kurungkheak she azan thsüchoh, tüsho nüsanü müyamrü nimkheamchoh.

²⁸Tüshe kheakü, muzhobah I kilim kheahang; tümüde nü miro ki inü akeangyu mütha.

²⁹Rholoang, inü tamkhüntamnüchoh, amülim dürhimo. Kheakü rholoang, I thiyuro alungki lah.

³⁰Thiyuro mülakhi I mulo kheak la shi? I münnü amükekhi mümükheah düpü?