Read Yimchungru Naga Job 7 Bible Online

Job 7 - Yimchungru Naga bible

Job 7

¹Alomi kheak mihtsürü khülang ju rhimo achak lah yung de, tüsho api nimungbo ju mulomüthsürü nimungbo ruk yung de?

²Azhorü khülangnü alamme mürheangkhi nangde, tüsho mulomüthsürübonü arü mihkhah dün mulong dukde akheahkhi nangde,

³junangde I khinu aban akeangkeang thsungkheak lakheah, tüsho thsünü tsüngrebo I kilim jih.

⁴I yapchoki inü tha, “ Küyimki I asürüba?” Tüshe tsüngre shanglah, tüsho ayinkhi khiungde I kolahkochide lah.

⁵I phü ju aribo tüsho dükhühnü lüpchimlah; I küp züngrüpchoh, tüsho anüke akhiukchoh.

⁶I nimungbo ju khim-keakrü khülüh kheaknü athribe, tüsho mulonglam mülade kheamabahchoh.

⁷O! I rhangdung ha sheak ah de lümkhitjang; I müknü küyimkishe atsü müngülo.

⁸I ngüde alakhi müknü I müngülo; nü mükbo I kheak lachoki I mülade akambah.

⁹Amo kheamabahkhi tüsho dükheakabahkhi nangde, shepü Ashe-lomi ching yüzahchonü makhiuklo;

¹⁰api nihbuh yam lim malodarü, yungsho api lapungnü kheaküa api mümükheah.

¹¹Jumonü inü I mün müdanlo;inü I me bukakhiukkhi chingnü athabah; inü I me khühkhi chingnü atsangbah.

¹²I keto a de, yungsho keto shiwüh ah de nünü I kurungkheak aheangrü zola de?

¹³Küyimki inü athaba, “I yapkiunü I shukheambah, I binkiunü I atsangkhi shukheambah,”

¹⁴nünü milimbonü I treshihchoh tüsho michihbonü I müyinsahshihchoh,

¹⁵ju hode I pang thsünüpü kheaknü a süksah-a shepü mokhitbah.

¹⁶Inü I rhangdung mukhiuka lah; I lünnü müla. I langzü zojang, tümüde I nimungbo sheak khülang ah.

¹⁷Nünü api shuhkihpü nü lümkhi api kheak zopü thsüde mihtsürü ha tümü a,

¹⁸yapsu aban api rhuakheahde, yapsu aban api rükakicho le?

¹⁹Anükhüh kheak thsungkheak nünü I kheaknü manguhba de, inü I mükeke muyu khiungde I langzü zojihba shi?

²⁰Nü mihtsürü kheahbuh, inü neak yihbeaka lasho, nü ki inü tümü thsüba? Tümüde nünü I nü mükkheahkih thsükhea? Tümüde I nü hahmülang kamkhea?

²¹Tümüde inü alakmihkhi neak mübahjih tüsho I amülim lude mutso le? Tümütüsho kheakü I alo ching yapbah; nünü I yimbah, tüshe I müngü. Bildad.