Read Yimchungru Naga Job 8 Bible Online

Job 8 - Yimchungru Naga bible

Job 8

¹Judüki Shuhairü Bildadnü alo:

²Külokhüh nünü hadürü thaba, tüsho nü yubo apung müküp nangde alaba?

³Thrünpuhnü thiyuro ahorimüchihcho de? Yungsho Wutonü alungki ahorimüchihcho de?

⁴Nü tsührübonü api azhihde neak yihbeaka lah khunuh, jumonü apinü arübo arü neak thülün thsümüchia lah.

⁵Nünü Thrünpuh yimsho tüsho Wuto ki mushusho,

⁶nü tsangkhitsho tüsho lungkisho, tsükjide api nü thsungkheak asürübah tüsho thiyuro lapung nü kilim jihlobah.

⁷Nü atankih aninikhüh lalashe nü ashube nimungbo khide ato labah.

⁸Tümütüsho kheakü ahokhi lünbo keokhikeoraang, tüsho arü jipürünü tümü yimkhitkheanü lümakheahang;

⁹tümüde isa yini yo ah tüsho isanü tümü mümükheah, tümüde alomi kheak isa nimungbo alamme khülang ah.

¹⁰Arünü nü ki müthsangyuba de tüsho müthaba de tüsho arü anikhitkhi chingnü thiyu müthaba de?

¹¹Alo müjapjap pung pheang mukhuhba de? Ke mülapung khiuk toba de?

¹²Abün mupungyide tüsho mukiushakyide, arü püpü sangrung müngühnü yiuhabahchoh.

¹³Harü ha Thrünpuh mihabahrü limrobo ah; Thrünpuh mümükheahrü mulonglam ju adükheakbah.

¹⁴Arü mulongram ju hingliu, arünü akinkhi ju mutruktrukbe zheang lah.

¹⁵Arünü thüyam kheak angükihsho, ju müzhip; arünü ju kheak tholobah yapsho, junü muwuhlo.

¹⁶Mihbukmuyuk ju ani ching mukhuhchoh, tüsho arü dübitbo shahwün ching buchoh.

¹⁷Arü yingbonü lungmujuk mükamde hingchoh; arü ju lung bolung lapü kheahchoh.

¹⁸Arübo arü dangpung chingnü rukkhitsho, arü reanglode ju dangpungnü thachoh, “Inü küyimkishe nü müngü.”

¹⁹Kheahang, harü ha arü asühpü limrobo, tüsho alo chingnü kheaküshe püpü mukhuhbah.

²⁰Kheahang, Thrünpuhnü amülim mülakhi mihtsürü mübahyuk, yungsho amütsü rhimorü she murung.

²¹Tütüshe apinü nü müneshihbah tüsho asühachihde azhishihbah.

²²Shepünü nü thraneanchonü achih ngüshihbah, tüsho mihbukmuyukrü khimyam mülade akambah. Job.