Read Yimchungru Naga Job 9 Bible Online

Job 9 - Yimchungru Naga bible

Job 9

¹Judüki Jobnü alo:

²Ha dükdü ah de inü mükheahlah; tüshe Thrünpuh miki mihtsürü küde thsah thiyuro lapü?

³Khürünü api kheak azhihde athapü lümlüm she chithürü lungnü anihbuhnü khülang she api ki malokhuk.

⁴Api lümlung süklah, tüsho sühmüh tolah. Shepünü Api azhihkhukde, tüsho akuk ngüde?

⁵Apinü awungbo lah-a bahchoh, tüsho apinü abukakhiukkhi ching arü lahyuka bahchoki arünü mümükheah;

⁶shepünü alomi adangpung chingnü niukcho tüsho dungjingbo ajancho;

⁷shepünü ani ki thiyukhüm jihcho, tüsho ju makhiuk; shepünü chiningbo tholocho;

⁸apinü lang thüningbo thoshangchoh, tüsho keto shiwüh düthsün kheak jungchoh;

⁹shepünü chiningthülü tüsho yamungshuhrü, chirhangshuhrü tüsho düjinglim chiningkhunungbo thsü;

¹⁰shepünü manikhitkhukpü thsüde atobo tüsho makekhukbe mihmüyinsahbebo thsü.

¹¹Kheahang, api I kinü hochoh, tüsho inü api müngü; api aphapchoh tüshe inü api mükheahkhit.

¹²Apinü lubah tsosho shepünü api tholokhukpü? Shepünü api ki, “Nü tümü thsücho?” de athapü.

¹³Thrünpuhnü abukakhiukkhi mutuklo; kükheangküyang müshiprü api khüp chungthülangdo yaplah.

¹⁴Dale küde thsah I yu yimkhitbah api ki alokhukpü?

¹⁵I amülim mülalashe, inü api ki malokhuk; I mahkhapbuh ki inü amushupü lah.

¹⁶Inü api ki jibah I ki alolo she, apinü I düsheak anibah de inü mükin.

¹⁷Tümüde apinü I chinthrüm müküpnü nütchoh, tüsho amüdopü mülade I mübo hihshihchoh;

¹⁸apinü I sheak müthsüshih tüshe I akhühnü mishihchoh.

¹⁹Ha sühmüh azhihachihkhi dükhülaa, api amüküpbuh ah! Ha mahkhap ah dükhülaa, shenü api jikhukpü?

²⁰I amülim mülalashe, I münnü I bahyukbah; I mungchih mülalashe, junü I amülim jihbah.

²¹I mungchih müla; tütüshe inü I mümükheah; inü I rhangdung thraneanlah.

²²Ha alala rukhüh; jumonü inü thachoh, “Apinü mungchih mülarü tüsho mihbukmuyuk ane chido thsümünimchoh.”

²³Küyimki thsümüchinü zukleang-shebe hande arübanü, amülim mülarü thsümüchi kheak apinü keangrümünechoh.

²⁴Alomi ju mihbukmuyuk khah ching jihdo; apinü mahkhaprübo mük lüpdojih — ha api yungsho, dale ju shepü a?

²⁵I nimungbo a alihrü kheaknü athribe; arübo shande tsoabahchoh, arünü tümü atsü müngü.

²⁶Arübo athukhi sangkung nangde, müleangnü shiwüh kheak keamkhi nangde yüchoh.

²⁷Inü thakhülaa, “Inü atsangkhi mihbah; I mulong tukthsükhi miro yinbah tüsho münemüzhibah.”

²⁸Judü lang I thsünü alala dünkheak I treabahdo, tümüde nünü I alim müjih de inü mükheahlah.

²⁹I bahyukabahbah; dale küde thsah I akeangkeang ching rhimopü?

³⁰Inü sabünnü I khah müsühsüh she tüsho dükhüh-throbenü I khah mütsaktsak she,

³¹nünü I akhimniuhniuh ching nimyukbah, tüsho I khimmihnü I thraneanbah.

³²Tümüde inü api ki alikhukpü thsüde tüsho ike rukhühnü mahkhappung ching yüpü thsüde, api mihtsürü khülang yung.

³³Ike chido kheak khah nimkihpü thsüde, ike dükeak mahtsahrü müla.

³⁴Apinü api tso I kheaknü lude tsosho, tüsho api atrebenü I mümüzünsho,

³⁵junangde api mütrede inü athabah, tüshe kheakü inü müthsükhuk.