Read Yimchungru Naga M. Khün 10 Bible Online

M. Khün 10 - Yimchungru Naga bible

M. Khün 10

¹Tümüde nü limshude la, O ATUNGPUH ? Tümüde küpkhuk kim ching nü jikcho?

²Mihbukmuyuknü api kükheangkhi ching zhochihrü thsümüchichoh; arünü asahkhi lümkhi ching arü phuhshang.

³Tümüde mihbukmuyuknü api mulong künkhi ching kükheangchoh; yihnelune mihtsürünü Thrünpuh athruchoh tüsho bahyukchoh.

⁴Mihbukmuyuknü api kükheangkhi chingnü Thrünpuh müyim; api lüm ching Thrünpuh müla.

⁵Api limrobo kamruhroro akuk ngüchoh; nü mahkhapkhibo api mikinü changde lah; apinü anihbuh riribo alala mükhemürangchoh.

⁶Apinü amulong ching lümchoh, “I maphap, I küyimkishe küpkhuk müngü.”

⁷Api mün ju athruaji tüsho mülapmüji le ajunonü milah; api mulo khüp küpkhuk tüsho mülimkhi lah.

⁸Apinü kiulongbo phünide jika binchoh; ajik dangpungbo ching apinü amülim mülarü mihkhukchoh; api mük müthsümülarü kheak ramde kheahkihlah.

⁹Kekhüzü ayam ching nangde apinü zhochihrü tholopü jika aleangde binchoh; apinü arü keang ching wuka lubah tsochoh.

¹⁰Zhotominrü ju züthünaka yapchoh; api sühmüh khüp arü keamchoh.

¹¹Apinü amulong ching thachoh, “Thrünpuhnü mihabahdo; api miro jiklah, apinü küyimkishe I müngü.”

¹²Asürang, O ATUNGPUH ! Nü khah chungkihang! O Thrünpuh, thsümütsürü dümihabah.

¹³Tümüde mihbukmuyuknü Thrünpuh bahyukcho? Apinü amulong ching thachoh, “Apinü I müthsümüchi.”

¹⁴Tüshe nünü ju ngüdo, tümüde nünü nü khahnü ajihlopü küpkhuk tüsho mulong rozhak kheahyukchoh. Müthsümülarünü anihbuh nü kilim shuhmülanga jihchoh; nü a mürerü rungrü ah.

¹⁵Mihbukmuyuk tüsho amütsü mihtsürü bin yihshakjang; api mihbukmuyuk shahjungde mülayi khiungde nünü yimang.

¹⁶ATUNGPUH ju lünnü lün kiulongthsürü; api lomi chingnü trükshihbo dükheakbah.

¹⁷ATUNGPUH , thsümütsürünü alunekhi sojang; nünü arü mulong toshang; tüsho arünü azhikhi anijang,

¹⁸mürerü tüsho junoa larü ki thiyuro rhimopü, junangde alomi mihtsürünü kheaküa mujuno.