Read Yimchungru Naga M. Khün 102 Bible Online

M. Khün 102 - Yimchungru Naga bible

M. Khün 102

¹I tamkhüntamnü sojang, O ATUNGPUH , tüsho inü azhikhi nü ki arüshang.

²I küpkhuk nimung nü miro I kheaknü düjik; I kilim nü nükhün muphoang; inü nü ji nimung I ki niokheamde alojang.

³Tümüde I nimungbo mokhüh nangde kheamabahchoh, tüsho I robo mokin nangde aniuchoh.

⁴I mulong kingdo tüsho rim nangde yiuhabahdo, junangde I yikhap tsühpü inü mihchoh.

⁵Tümütüsho I ashearakhi düsheaknü I robo I küp kheak dakkihchoh.

⁶I a sunglo ching merhamtopü nangde lah; I a loshelo ching lungru nangde lah.

⁷I mükmutrude yaplah, tüsho thüyam-mün kheak khüjak alangzü lakhi nangde lah.

⁸I riribonü nimung amuyung I mükhemükimchoh, tüsho sherünü I münejihchonü I azhihde thiyuchihchimchoh.

⁹Tümüde inü awahbo ju yikhap nangde tsühdo, tüsho I chikebo ayungbe lung düsahdo,

¹⁰tümütüsho nü mulong zhipzhipkhi tüsho nü bukakhiukkhinü ah; tümüde nünü I shuhkih tüsho jipa bah.

¹¹I nimungbo ju ashangkhi me khülang nangde lah, tüsho rim nangde yiuhabahchoh.

¹²Tüshe O ATUNGPUH , nü lünnü rünkhiungde alabah, tüsho lünbo alala ching nü mung lümkhitkhi labah.

¹³Nü asürübah tüsho Zion kheak mihmüthsüm labah; tümüde alibe muzhopü kim akhukhi arüdo.

¹⁴Tümüde nü yamlarübonü anihbe lungbo kheak asühchoh, tüsho anihbe asungthulung ki amuzho huhchoh.

¹⁵Junangde trükshihbonü ATUNGPUH mung, tüsho alomi kiulongthsürübo alalanü nü müretahkhi trebah.

¹⁶Tümüde ATUNGPUHNÜ Zion thsülobah; anihbuh müretahkhi ching api akhiukbah.

¹⁷Apinü abahyukkhi mihtsürübonü tamkhüntamnükhi leangkhijihbah, tüsho arü tamkhüntamnükhi mükhemükim müthsü.

¹⁸Ha arübe lünbo thsungkheak thrütbah, junangde müthrünyide alakhi mihtsürünü ATUNGPUH shibah.

¹⁹Tümüde apinü api arüngakopung achang chingnü abinkhia kheahchoh; ATUNGPUHNÜ yinmi chingnü alomi chinzhindo,

²⁰aramrü ashekhi anipü, ashepü akhua larü trünkhipü,

²¹Zion ching ATUNGPUH mung, tüsho Jirusalem ching api shikhi khipkhitpü,

²²mihtsürübo tüsho kiulongthsübo ATUNGPUH tankihpü rukhüh mukhungchoki ah.

²³Apinü limro ching I sühmüh keakeade kamshih; apinü I nimungbo khihshih.

²⁴Inü tha, “O I Thrünpuh, I nimungbo aphulungnü I bede dütso; nü kambo lünbo alala ching lah.

²⁵Atankih ching nünü alomi khimtanbo thsü, tüsho thüningbo nü khah rhimo ah.

²⁶Arübo adükheakbah, tüshe nü a rünkhiungbah; arü alala khimmih nangde amürhütbah; khimmih nangde nünü arü müthribah, tüsho arübo amüthribah.

²⁷Tüshe nü a rukhüh ah, tüsho nü kambo akheam müla.

²⁸Nü yamlarübo tsührübo mutuklode alabah, tüsho arü tsühsoniusobo nü miki rünkih-a labah.”