Read Yimchungru Naga M. Khün 104 Bible Online

M. Khün 104 - Yimchungru Naga bible

M. Khün 104

¹ATUNGPUH shiang, O I me; O ATUNGPUH I Thrünpuh, nü khide tolah: nü a wüntre tüsho wüntre-müretah yihlah,

²shepü khimmih nangde ayinnü phudola, shepünü zhindokhim nangde thüningbo thoshang,

³tüsho kebo kumung nü yam thsü. Nünü amobo nü khora-lolungbe thsü, tüsho apung ghidükeangbo kheak bin.

⁴Nünü apungbo nü yunithsürübo, tüsho chinchobe phürapkhi nü yamlarübo thsü.

⁵Nünü alomi khimtan thsü, junangde ha lünnü maphap,

⁶nünü ju khimmihnü nangde asükbonü yihdo; tüsho kebonü müzüngbo yihdo.

⁷Nünü athürühkhinü arübo tso; nü tsüngmukkhi düsheaknü arü niokhamde tso.

⁸Arünü müzüngbo kheak yükih; arünü jindükhünbo ching, nünü arü khilim thsükhi lim yüzah.

⁹Arünü muhopü thsüde, arünü rholobah alomi müzhidopü thsüde nünü aredungbo zojih.

¹⁰Apinü jindükhünbo ching yungzübo, tüsho awungbo dükeak ching ayungbo bukshihchoh.

¹¹Arünü mükeak shiwüh aban kilim ayungpü jihchoh; mütüm donkibo arü kethüririchoh.

¹²Arü hode thüning wuhnubo arü lapung lah; arünü sangkhahbo ching khün thsüchoh.

¹³Apinü api achangbe khiungshak chingnü awungbo kheak ke dütsütchoh; nü rhimobo aso asokhinü alomi reangkeamde lah.

¹⁴Apinü moshibo thsungkheak rimbo tüsho mihtsürü wochakshihpü sangrungbo mukhuhshih, junangde apinü alo chingnü tsühyungbe akhiukshihbah,

¹⁵tüsho mihtsürü mulong asühshihpü yukhu, api miro zhingzhingshihpü müdangke, tüsho mihtsürü mulong düküngshihpü yikhap.

¹⁶ATUNGPUH sangdungbo apinü akhimkhi Lebanon cedarbo tsüde ke duh-a lah.

¹⁷Ju ching wuhnubonü arü sapbo shuchoh; kewuhnu a tsünsangbo ching ayam lah.

¹⁸Awung achangbo ju mütüm mihnubo thsungkheak lah; lungrhünbo ju lungthsühri jikpung ah.

¹⁹Apinü akheahmünchibo thsungkheak khinu zojih; aninü ayüzahpü kim mükheahlah.

²⁰Nünü amiting thrün, tüsho ha azhing lah, ju ching mütüm shiwühbo abüde tsahchoh.

²¹Kekhüzü nunubonü arü jim Thrünpuh kilimnü yimchoh.

²²Küyimki ani akhiukbanü, arünü rukhüh mukhungchoh tüsho arü yambo ching yapchoh.

²³Mihtsürünü nihbuh rhimo ching yüchoh tüsho arelim khiungde rhimochoh.

²⁴O ATUNGPUH , nü rhimobo küdükhüh she la! Lümlung ching nünü arü alala thrün. Alomi ju nü lorilokobonü milah.

²⁵Muliuke ato tüsho amülih ching amükhebin lorilokobo ato tüsho anini chido lah.

²⁶Ju ching sangkung phungde tsahchoh; tüsho nünü ju ching awuhpü thrünkhi Leviathan lah.

²⁷Harü alalanü nü aleangchoh, junangde nünü akheahmünchi ching arü kilim tsühyungbe jihbah.

²⁸Nünü tümü arü kilim jihchonü, arünü hanmukhungchoh; nünü nü khah trünchoh, arübo atsünü mia lah.

²⁹Küyimki nü miro jikbanü, arü küpkhukchoh; nünü arü sheak lude tsochoh, arü shechoh tüsho arü yo asungthulung lim rholochoh.

³⁰Küyimki nünü nü me thiyibanü arü thrüna lachoh; tüsho nünü alomi aso kamloshihchoh.

³¹ATUNGPUH müretahkhi lünnü rünkhiungshang; ATUNGPUHNÜ api yubo ching asühshang.

³²Apinü alomi kheak kheahchoh, tüsho ju ajanchoh; apinü awungbo qiuchoh, tüsho jurü mokhühchoh.

³³I la khiungde inü ATUNGPUH ki khün thsübah; I rhang lachoki inü I Thrünpuh ki mungshi khün thsübah.

³⁴I tamkhüntamnü-lüm api ki niungde kamshang; inü ATUNGPUH lung asühbah.

³⁵Aneakrübo ju alomi chingnü muyuabahshang, tüsho mihbukmuyuk mülade kamshang. ATUNGPUH shiang, O I me! ATUNGPUH Shiang!