Read Yimchungru Naga M. Khün 106 Bible Online

M. Khün 106 - Yimchungru Naga bible

M. Khün 106

¹ATUNGPUH shiang! O, ATUNGPUH kilim makshe jihang, tümüde api tsülah; tümütüsho api amüthsüm lünnü rünkhiungde lah.

²Shepünü ATUNGPUHNÜ ato rhimokhi zhiyukkhukla? Yungsho api mungshi alala khipkhitkhukla?

³Shepünü kim alala ching thiyuro zocho, tüsho thiyuro-lungki rhimochonü müngühmühi!

⁴O ATUNGPUH , nünü nü mihtsürü rungchoki I lümkhitang; nü akhümkhit bede I rhua kheahang,

⁵junangde nünü amokhitkhi alü thsükhi inü angübah, junangde nü trükshih asühkhi ching inü asühachihbah, junangde nü yamrüplurüp lung inü müretahbah.

⁶Isanü isa jipürü lung neak yihbeakdo, isanü amülim yihbeakdo, isanü mihbukmuyukde rhimodo.

⁷Isa jipürübonü Ijip ching nü amüyinsahbebo manikhit; arünü mükhebinkhi nü amüthsümbo mülümkhit, tüshe Amürüm Keto yeannü Wutobuh azhih.

⁸Judüalalashe api mung chingnü apinü arü khümkhit, junangde apinü api wu ato mükheahshihpü lakheah.

⁹Apinü Amürüm Keto she thürüh, tüsho ju ngahabah; junangde apinü arü asükbo hode, sunglo hode be.

¹⁰Apinü arübo thraneanrü khah chingnü khümkhit, tüsho thiriri khah chingnü arü rhokhit.

¹¹Kebonü arü riribo zhido; arü khülang she maning.

¹²Judüki arünü api yubo kin; arünü api mungshi khün thsü.

¹³Arünü nahde api rhimobo mih; arünü api lümthiyan maleang,

¹⁴tüshe sunglo ching hodakde tsühyungne, tüsho loshelo ching Thrünpuh rükaki.

¹⁵Tüsho apinü arü kilim arünü amushukhi jih, tüshe arü kheak atrebe tukthsü yüshih.

¹⁶Küyimki arünü binkheampung ching ATUNGPUH kilim tsangkhitkhi Mosa tüsho Aron mükthsükhea,

¹⁷alonü khimshuh tüsho Dathan muyuabah tüsho Abiram borü yihdoabah.

¹⁸Arü bolung mo takmusu; motrunü mihbukmuyuk aniuabah.

¹⁹Arünü Horeb ching moshi nunu khülang thsü tüsho sangthsü kingaün.

²⁰Hanangde arünü arü müretahkhi rim tsühbe moshipung mejak ching müthriabah.

²¹Arünü arü khümkhitrü Thrünpuh mih, shepünü Ijip ching ato rhimokhea,

²²Ham lo ching amüyinsahbe rhimobo, Amürüm Keto ki atrebebo.

²³Küyimki Thrünpuhnü api mihtsürü thsümünimpü thakhea, apinü mokhitkhi yamlarü Mosanü Thrünpuh reanglode zhip tüsho arü thsümünimpü api bukakhiukkhi tukloshih.

²⁴Judüki arünü alo atsü bahyuk; arünü api yu mükin,

²⁵tüshe arü khimyambo ching dapdapneangneang, tüsho ATUNGPUH düsheak mani.

²⁶Jumonü apinü arübo sunglo ching jipa bahpü, arü azhihde thiyuchihchim ching akhah chungkih,

²⁷arü tsühsoniusobo trükshih bolung jipa bahpü tüsho arübo lomi ching müzütshihpü lakheah.

²⁸Arünü Peor ching Baal kingaünpü berung, tüsho ashekhi thrünpuh shuhmülanga kingaünkhibo tsüh.

²⁹Hanangde arü rhimobonü api bukakhiukshih, tüsho arü bolung arüm akhiuk.

³⁰Judüki Phinehasnü asürü tüsho zhipdo, tüsho arüm ju tukloabah.

³¹Tüsho ha akheam müla lünbo khiungde api thsungkheak thiyuro-lungki khejih.

³²Meriba kebo ching arünü ATUNGPUH bukakhiukshih, tüsho arü dünkheaknü Mosa kheak küpkhuk arü;

³³Tümütüsho arünü api me azhih, junangde apinü mükümkangde thiyu thakhit.

³⁴Arü ki ATUNGPUHNÜ thiyukhüm jihkhi yande arünü mihtsürübo mülaksah,

³⁵tüshe arünü khiungkerü lung yihluachih tüsho arü rhimobo anikhit;

³⁶arünü arü sangthsübo tankih, ju arü ki qimürip kamabah.

³⁷Arünü arü tsührübo le tsührübebo she arimribo kilim shuhmülanga jih,

³⁸tüsho amülim-mülarü thiyih bukshih, arü tsührübo le tsührübebo thiyih she, Kananrü sangthsübo kilim shuhmülanga jih; tüsho alo ju thiyihnü müneana lakheah.

³⁹Hanangde arü nihbuh rhimobo hode arü müneanabah, tüsho arü nihbuh rhimobo hode müzammüram thsü.

⁴⁰Jumonü api mihtsürü azhihde ATUNGPUH bukakhiukde kam, junangde apinü nihbuh yamrüplurüp thranean.

⁴¹Tüsho apinü arü khiungkerü khah ching jih, tüsho arü thraneanrünü arü kurungkheak yakzan shuh.

⁴²Arü riribonü arü juno, tüsho arü khah ching laabahshih.

⁴³Apinü ahihdo ki arü bekhit; tüshe arünü api azhihpü mokhit tüsho neak ching sükde keamyuk.

⁴⁴Judüalalashe apinü arü zhikhi sochoki arü dukmüsüpkhi lümrhihde kam;

⁴⁵tüsho arü dünkheaknü apinü api tangzüng lümkhit, tüsho mükhebinkhi api amüthsümbo yande lümalo.

⁴⁶Apinü arübo ramde ayürübonü she arü kheak muzhoshih.

⁴⁷Nü mung amüsüh kilim makshe jihpü tüsho nü mungshikhi ching akuk ngüpü, isa khümkhitang, O ATUNGPUH isa Thrünpuh, tüsho isa khiungkerü bolungnü bemukhungang.

⁴⁸ATUNGPUH Israel Thrünpuh akheam mülakhi chingnü akheam müla khiungde shiang, Mihtsürü alalanü thashang, “Amen!” ATUNGPUH shiang.