Read Yimchungru Naga M. Khün 107 Bible Online

M. Khün 107 - Yimchungru Naga bible

M. Khün 107

¹O, ATUNGPUH kilim makshe jiang, tümüde api tsülah! tümütüsho api amüthsüm lünnü rünkhiungde lah.

²ATUNGPUHNÜ rhokhitkhinü thashang, shepü apinü thiriri khah chingnü rhokhit,

³tüsho lomibo chingnü bemukhung, aniakhiuklim tüsho aniyüzahlimnü, dukulim tüsho düjinglimnü.

⁴Arübo sunglo ching azhik limro ching rümde tsah; arü lapü kiuto müyimkhit.

⁵Khümde tüsho kethüride, arü mulonglam müladebah.

⁶Judüki arünü arü küpkhuk ching ATUNGPUH ki zhi, tüsho apinü arü lümthsünübo chingnü bekhit.

⁷Tüsho apinü arübo alungki limrobo mikhuh be, junangde arünü alapü thsungkheak kiuto lim yüpü lakheah.

⁸O, mihtsürübonü api tsükhi, tüsho mihtsürü tsührü kilim api amüyinsahbe rhimokhibo thsungkheak ATUNGPUH kilim makshe jihkhülaa!

⁹Tümüde apinü kethürikhi reangkeamshihchoh tüsho akhümkhi atsünü bukthsüshihchoh.

¹⁰Khürü aliudokhi tüsho amiting ching lakheah, aramrübo wuhrünliubo ching thsünü,

¹¹tümütüsho arünü Thrünpuh yubo azhih, tüsho Khide Achang lümthiyan bahyuk,

¹²jumonü apinü arübo rhimo achak rhimode khisahshih, arü lunga yap, tüsho arü rungrü she mülakheah.

¹³Judüki arünü arü küpkhuk ching ATUNGPUH ki zhi, tüsho apinü arü lümthsünübo chingnü khümkhit.

¹⁴Apinü arü amiting tüsho ashe alamme chingnü bekhit, tüsho arü wuhrünliubo adütre kamde yihthünak.

¹⁵O, mihtsürübonü api tsükhi, tüsho mihtsürü tsührübo kilim api amüyinsahbe rhimokhibo thsungkheak ATUNGPUH kilim makshe jihkhülaa!

¹⁶Tümüde apinü müwayinchi ripitbo thsümünim, tüsho yinchi-khrih mahne thsüde yihshak.

¹⁷Arünü alakmihkhi hode makhaabah, tüsho arü amülimbo hode thsünüshih.

¹⁸Arünü tsühyungbe mungji alala mütsühnede kam, tüsho arü ashe chipiripit thüninde yü.

¹⁹Judüki arünü arü küpkhuk ching ATUNGPUH ki zhi, tüsho apinü arü lümthsünübo chingnü khümkhit.

²⁰Apinü api yu yüshih tüsho arü thsüngu, tüsho arü thsümünimpübo chingnü arübo bekhit.

²¹O, mihtsürübonü api tsükhi, tüsho mihtsürü tsührübo kilim api amüyinsahbe rhimokhibo thsungkheak ATUNGPUH kilim makshe jihkhülaa!

²²Arünü makshe jihde laksah-a kingaünkhi shuhmülanga jihshang, tüsho api rhimobo asühachihde khipkhitshang.

²³Sherü sangkung chingnü keto ching yüzahcho, sherü ke atobo kheak shothsümolocho,

²⁴arünü asük ching ATUNGPUH rhimobo tüsho api amüyinsahbebo ngüchoh.

²⁵Tümüde apinü thiyukhüm jihchoh tüsho chinthrüm apung asürüshihchoh, junü keto abükkhi bekihchoh.

²⁶Arünü thüning khiungde yükih, arünü kheaküshe asükbo ching yüki; küpkhukkhinü arü me niuthünakchoh.

²⁷Arünü amüshangrü mihtsürü nangde jing mükhe tüsho yingying tsah; arü yeanzamkhi alala yihnüpü mülakhi lakheah.

²⁸Judüki arünü arü küpkhuk ching ATUNGPUH ki zhi, tüsho apinü arü lümthsünübo chingnü bekhit.

²⁹Apinü tsüngpungtsüngpung keamloshih, junangde ke abükkhi zhikde la.

³⁰Judüki arü asüh tümütüsho arü zhikde la; jumonü apinü arünü akünkhi sühakhimpung lim arü be.

³¹O, mihtsürübonü api tsükhi, tüsho mihtsürü tsührübo kilim api amüyinsahbe rhimokhibo thsungkheak ATUNGPUH kilim makshe jihkhülaa!

³²Arünü amukhungrü mihtsürü bolung she api shuhkihshang, tüsho azothsürü mukhungkhi ching api shishang.

³³Apinü ayungbo ju sunglo, tüsho ke bukpungbo akung lo kamshih;

³⁴aso asokhi lo ju akukruk lo kamshih, ju ching larü mihbukmuyukkhi hode alakheah.

³⁵Apinü sunglo ju kekhipbo, tüsho akung lo ju ke bukpungbo kamshih.

³⁶Ju ching apinü akhümrü lashih, junangde arünü alapü thsungkheak kiuto thsüpü lakheah,

³⁷tüsho thulubo mükhean tüsho kurungasoliubo khim junangde pung alungde yimlupü lakheah.

³⁸Apinü arü müngühjih, tüsho arü tode wüh bu; tüsho apinü arü moshi münungzüshih.

³⁹Küyimki arü junokhi, thsünükhi tüsho mulong rozhakkhi hode nungzüde tüsho abobe kamkhea,

⁴⁰apinü yakzanshuhrübo kheak abahyukkhi yükihshih, tüsho arübo sunglo ching limro mülapung rümde tsahshih;

⁴¹tütüshe apinü müthsümülarü thsünü chingnü bemusu, tüsho arü yamkhünbo mihnu boto nangde kamshih.

⁴²Thiyuro-lungkirünü ju ngübah asühachihchoh, tüshe mihbukmuyuk alala arü münbo yihdochoh.

⁴³Sherübo lümlung lanü harübo anibah. Tüsho arünü ATUNGPUH mihmuzho anikhitbah.