Read Yimchungru Naga M. Khün 108 Bible Online

M. Khün 108 - Yimchungru Naga bible

M. Khün 108

¹I mulong düküngde lah, O Thrünpuh; inü khün thsübah tüsho I me alalanü khün düsheak thsübah.

²Asürang, khungpi tüsho bingshang! Inü yapsu yinkhishihbah.

³O ATUNGPUH , inü mihtsürü bolung nü shijihbah, tüsho inü trükshih bolung nü ki mungshi khünbo thsübah.

⁴Tümüde nü amüthsüm ju thüningbo kumung lah, tüsho nü thiyuronü amobo khiunglah.

⁵O Thrünpuh, thüningbo kumung shuhkihang, tüsho nü müretah alomi alala kumung lashang;

⁶nü khah tsülimnü khümkhitang tüsho I ki sojang, junangde nünü muzhokhi bekhitbah.

⁷Thrünpuhnü api amüsühkhitkhi chingnü asukdo: “Inü asühachihbah; inü Shekem chamnakbah tüsho Sukkoth jindükhün akebah.

⁸Gilead I yo; Manase I yo; Ephraim she I yinchi-kuthran; Juda ju I kiulongthsü tso.

⁹Moab I müsühmüra-phuru; Edom kheak inü I jingkhümpü bahbah; Filistia kheak inü akukbah.”

¹⁰Shepünü I amüküp kiuto ching bede yüzahba? Shepünü I Edom lim bede ayüba?

¹¹O Thrünpuh, isa bahyukbuh ju nü yung de? Tüsho O Thrünpuh, nü isa riribo lung müyükhi yung de?

¹²Küpkhuk chingnü isa arung jihang, tümüde mihtsürü ju akeangkeang.

¹³Thrünpuh hode isanü akuk ngübah tüsho apinü isa riri junakbah.