Read Yimchungru Naga M. Khün 109 Bible Online

M. Khün 109 - Yimchungru Naga bible

M. Khün 109

¹O inü shijihkhi Thrünpuh, zhikde düla!

²Tümüde mihbukmuyuk mün tüsho mülapmüji mün I azhihde kaa lah; arünü keangtha mulonü I azhihde asukdo.

³Arü athranean yubonü I mükamdoa lah, tüsho amudopü mülade I bede thirithsüdo.

⁴Inü amuzhokhi müthri arübo ju I müdamrü ah, tüshe I a tamkhüntamnüde lah.

⁵Hanangde arünü I kilim atsü müthri amütsü, tüsho amuzho müthri athranean jihlodo.

⁶Api kurungkheak mihbukmuyuk mihtsürü zojang, tüsho amüdamrü api khah tsülim zhipshang.

⁷Küyimki api mahkhapbanü, api amülim ngükhitshang, tüsho api tamkhüntamnü neak kamshang.

⁸Api nimungbo nükshang, tüsho püpürünü api rhimoyam lushang.

⁹Api tsührübo mürerü, tüsho aniube khimoberü kamshang.

¹⁰Api tsührübo kakheangde rümde atsahrü kamshang; arü yo athsümünimkhi yambo chingnü arü yankhitshang.

¹¹Shozüngrünü api lakhi alala lushang, tüsho hanrünü api rhimokhi yankhia lushang.

¹²Api ki amüthsüm huhrü she dülashih, yungsho api tsührü mürerü lümrhihrü she dülashih.

¹³Api tsühsoniuso kheamshang tüsho arü lün khekhi ching arü mung nankhita bahshang.

¹⁴Anihbuh jipürü mülimkhi Thrünpuh miki lümkhitshang, tüsho anihbuh abe neak nankhita dübahshih.

¹⁵Arübo ATUNGPUH miki mutukzhakde lashang, junangde apinü arü lümrhihpü alomi chingnü akheamshihbah;

¹⁶tümütüsho apinü mihmuzho huhpü mülümkhit, tüshe zhochihrü tüsho müthsümüla mihtsürü thsümüchi, junangde apinü mulong thsümünimrü laksah.

¹⁷Apinü muthrumünean muzhokhi nangde, api kheak ju arüshang; apinü müngühmühi ching masühkhi nangde, api kheak ju limshushang.

¹⁸Apinü muthrumünean ju akhimmih nangde phuyuchoh; ha apang ching ke nangde, arobo ching müdangke nangde yüzahchoh.

¹⁹Ha api hingbe khimmih, lünnü api mükamde arümbe nangde lashang.

²⁰Ha I amülim jihrü tüsho I azhihde amütsü asukrü kilim ATUNGPUH thsambah thsüshang.

²¹Tüshe O Atungpuh T HRÜNPU H , nü mung chingnü nünü I ki tsüde rhimoang; tümütüsho nü amüthsüm tsülah, I bekhitang.

²²Tümüde I a zhochihrü tüsho müthsümülarü ah, tüsho I mulong alung ching yuria lah.

²³Arelim alamme nangde I tsoabahdo; tangkho nangde I yünde tsodo.

²⁴Khümkeak thsükhinü I mukhungbo sühmüh müla, tüsho I a küp le robo lang ah.

²⁵I a arü ki münedung kamdo; küyimki arünü I kheahbanü arü kubo lukchoh.

²⁶I rungang, O ATUNGPUH I Thrünpuh! Nü amüthsüm ayannü I khümkhitang,

²⁷junangde ha nü khah ah, nü ATUNGPUHNÜ ha rhimodo de arünü amükheahbah!

²⁸Arünü athruajishang, tüshe nünü müngühjang; küyimki arü asürübanü arü achih ngüshang, tüshe nü yamlarü asühshang.

²⁹I müneahrübo achih ngükhi yihshang, tüsho khimmih nangde arü lümchihyuknü arü lüpdoshang.

³⁰Inü I münnü tode ATUNGPUH shijihbah; am, inü boto bolung api shijihbah.

³¹Tümüde api zhochihrü khah tsülim, api bahyukrü kheaknü akhümkhitpü zhiplah.