Read Yimchungru Naga M. Khün 115 Bible Online

M. Khün 115 - Yimchungru Naga bible

M. Khün 115

¹Isa kilim yung, O ATUNGPUH , isa kilim yung, tüshe nü amüthsüm tüsho nü thiyuro dünkheaknü nü mung müretahshang.

²Tümüde trükshihbonü athashihpü, “ Kheakü arü Thrünpuh küching la?”

³Tüshe isa Thrünpuh a yinmi ching lah; apinü tümüpürü künlanü rhimochoh.

⁴Arü sangthsübo ju shotoyinchi tüsho suna, mihtsürü khah rhimo ah.

⁵Arü münbo lah, tüshe arünü thiyu mütha; arü mükbo lah, tüshe arünü müngü;

⁶arü nükhünbo lah, tüshe arünü muso; arü nupungbo lah tüshe arünü mümünim;

⁷arü khahbo lah, tüshe arünü mükülüp; arü jingbo lah, tüshe arünü mütsah; yungsho arü thru chingnü düsheak müthsü.

⁸Sherünü jurü thsükheanü arü nangde lah; jurü kheak kinrü abannü junangde lah.

⁹O Israel, ATUNGPUH kheak kinang; apinü nüsa rungchoh tüsho tsungdochoh.

¹⁰O Aron yamkhün, ATUNGPUH kheak kinang; apinü nüsa rungchoh tüsho tsungdochoh.

¹¹Nüsa sherü ATUNGPUH trechonü, ATUNGPUH kheak kinang; tümüde apinü nüsa rungchoh tüsho tsungdochoh.

¹²ATUNGPUHNÜ isa lümanude lado; apinü isa müngühjihbah; apinü Israel yamkhün müngühjihbah; apinü Aron yamkhün müngühjihbah.

¹³Apinü ATUNGPUH trerü, anini tüsho ato chido müngühjihbah.

¹⁴ATUNGPUHNÜ nüsa le nüsa tsührü kilim alü wüh bushang.

¹⁵Yinmi tüsho alomi thrünrü, ATUNGPUHNÜ nüsa müngühshang.

¹⁶Achangbe yinmibo ATUNGPUH yo ah; tüshe apinü alomi ju mihtsürü tsührübo kilim jih.

¹⁷Asherü yungsho azhik ching yüzahrünü ATUNGPUH mungshi müjihchoh.

¹⁸Tüshe ha kimnü ründe tüsho lünnü isanü ATUNGPUH shijihbah. ATUNGPUH shiang!