Read Yimchungru Naga M. Khün 118 Bible Online

M. Khün 118 - Yimchungru Naga bible

M. Khün 118

¹O, ATUNGPUH kilim makshe jihang, tümüde api tsülah; tümütüsho api amüthsüm lünnü rünkhiungde lah!

²Israelnü kheakü thashang, “Api amüthsüm lünnü rünkhiungde lah.”

³Aron yamkhünnü kheakü thashang, “Api amüthsüm lünnü rünkhiungde lah.”

⁴Sherünü ATUNGPUH trelanü kheakü thashang, “Api amüthsüm lünnü rünkhiungde lah.”

⁵Inü lümthsünü ching ATUNGPUH ki ji; ATUNGPUHNÜ I ki alo tüsho amülih dangpung ching I zojih.

⁶ATUNGPUH I kilim tsanglah; inü mütre. Mihtsürünü I ki tümü thsükhukpü?

⁷I rungrü bolung ATUNGPUH ju I thsungkheak lah; jumonü inü I thraneanrü kheak I künkhi kheahbah.

⁸Mihtsürü kheak mulongram lapü dün a ATUNGPUH kheak kinkhi atsübe ah.

⁹Yakzanshuhrübo kheak mulongram lapü dün a ATUNGPUH kheak kinkhi atsübe ah.

¹⁰Trükshih alalanü I zündoa lah, tüshe ATUNGPUH mung chingnü inü arü thsümünimbah.

¹¹Arünü I zündoa lah, am arünü I zündoa lah; tüshe ATUNGPUH mung chingnü inü arü thsümünimbah.

¹²Mukhubo nangde arünü I zündoa lah; arübo ayangrung aniukhi nangde aniuabah; tümüde ATUNGPUH mung chingnü inü arü thsümünim.

¹³Nünü I alungpü thsüde lungchihde nim, tüshe ATUNGPUHNÜ I rung.

¹⁴ATUNGPUH ju I sühmüh tüsho I khün, tüsho api I akhümkhit kamdo.

¹⁵Asühachih tüsho akhümkhit düsheak thiyuro-lungkirü khimyambo ching lah; ATUNGPUH khah tsülimnü müzhakde rhimochoh.

¹⁶ATUNGPUH khah tsülim shuhkih-a lah; ATUNGPUH khah tsülimnü müzhakde rhimochoh.

¹⁷I müshe, tüshe arang labah, tüsho ATUNGPUH rhimobo khipkhitchoh.

¹⁸ATUNGPUHNÜ I khitode thsümüchido, tüshe apinü I müsheshih.

¹⁹Thiyuro-lungki chipiripitbo I kilim khimshuhjang; inü jurü hode ayübah, tüsho inü ATUNGPUH shijihbah.

²⁰Ha ATUNGPUH chipiripit lah, ha hode thiyuro-lungkirü yüzahbah.

²¹Inü nü shibah, tümüde nünü I ki alojih, tüsho I akhümkhit kamdo.

²²Thüyam thsürünü abahyukkhi lung ju amühit-lung adungtobe kamdo.

²³Ha ATUNGPUH rhimo lakheah; ha isa mük ki amüyinsahbe lah.

²⁴Ha ATUNGPUHNÜ athrünkhi nimung ah; isanü ha ching asühachihbah tüsho asühbah.

²⁵Kheakü khümkhitang, inü tamkhüntamnüchoh, O ATUNGPUH ; O ATUNGPUH , inü tamkhüntamnüchoh, kheakü akuk ngüshang.

²⁶Shepü ATUNGPUH mung ching arüchonü müngühmühi! Isanü ATUNGPUH yam chingnü nüsa müngühjihdo.

²⁷Thrünpuh ju ATUNGPUH ah, tüsho apinü isa kilim ayin jih; laksah-a kingaünkhibo ju liubonü kingaün sadam juhbo kheak rhükkihang.

²⁸Nü I Thrünpuh, tüsho inü nü shibah; nü I Thrünpuh, inü nü shuhkihbah.

²⁹O, ATUNGPUH kilim makshe jihang, tümüde api tsülah! Tümüde api amüthsüm lünnü rünkhiungde lah.