Read Yimchungru Naga M. Khün 143 Bible Online

M. Khün 143 - Yimchungru Naga bible

M. Khün 143

¹I tamkhüntamnü sojang, O ATUNGPUH , inü amushukhibo anijang! nü thiyuro lakhi tüsho nü thiyuro-lungki ching I ki alojang.

²Nü yamlarü kheak mahkhappü ching düyüzah, tümüde nü miki rhangdung lakhi sheshe thiyuro-lungki müla.

³Tümüde thiririnü I müshamdo; apinü I rhangdung alo kheak zükihdo; apinü I adüsonü asherü nangde amiting ching lashih.

⁴Jumonü I me zhidoa lah, I mulong ching lümthsünü lah.

⁵Inü awün nimungbo lümkhitchoh; inü nü rhimobo kheak lümakheahchoh; inü nü khah rhimobo lümzülümdochoh.

⁶Inü nü kilim I khahbo chungkihchoh; akung lo nangde I menü nü mürheangchoh.

⁷I ki niokheamde alojang, O ATUNGPUH ; I me dükheakchoh! nü miro I kheaknü düjik, jude yungsho I ju alokhün ching yüzahrü nangde alabah.

⁸Yapsu nü muzho inü soshang, tümüde inü nü kheak kinchoh; I tsahpü limro I ki mükheahshang, tümüde inü nü ki I me shuhkihchoh.

⁹O ATUNGPUH , I riribo kheaknü I bekhitang; inü nü kheak tsoyukchoh.

¹⁰Nü lümkhi rhimopü I ki thsangyuang, tümüde nü I Thrünpuh ah; nü me atsünü alungki limro ching I beshang.

¹¹ATUNGPUH , nü mung thsülimnü I thsüphulojang! nü thiyuro-lungki thsülimnü küpkhuk chingnü I bekhitang.

¹²Nü amüthsüm ching I riribo dükheakshang, tüsho I azhihrü alala thsümünimshang; tümüde I nü yamlarü ah.